Ki jingiakren ki long kiba tei, ym kiba pulom kum ha ki 50 snem bala leit
Shillong, Jylliew 30 : U Myntri Rangbah Conrad K Sangma ha ka sngi Ba-ar ula pyntip ba ka jingiakren halor ka jingiakajia pud bad ka Assam kan sa sdang biang hadien bala dep thaw thymmai ia ki Regional Committee, bad bynrap ba baroh artylli ki Jylla ki kwah ban pynlong noh kham kloi ia ka jingiakren.
U Conrad ula ong ba ka jingslem ka dei namar ka jingpynheh ia ka Kynhun Myntri ha Assam bad ka jingbujli ia ki Myntri ha baroh ar jylla, hynrei ula ban jur ba kane ka jingiakren mynta ka dei kaba tei ym kum ki jingiakren ba pulom jong ki snem bala leit noh.
“Ha ka jingshisha, ngi la hap thaw biang ia ki Regional Committee namar ka jingbujli Myntri kaba jia hangne. Namar kata, ngi kwah ban pynthikna ba ngin pynneh ia ka kyrdan. Kumta ngi la leh ia kane ka jingpynthymmai ha ki khyndiat sngi bala leit” ong u Conrad haba iakren bad ki nongthoh khubor.
“Ngi dang ap namar ka Assam ka hap ban pynheh ia ka kynhun Myntri, kaba dang shu dep ha u bnai bala lah. Khlem pep, man ki Myntri ki don ia bun ki kam ba ki hap leh hala ki jong ki Tnad ba ki Ministry” ula ong.
U Myntri Rangbah ula pynpaw ba ki jingiaren kin sa iaid biang shakhmat hadien ba ka Assam kala tynrong ia ki jingkitkhlieh. “Nga thikan ba hadien bala biang lut hadong hadong, u Myntri Rangbah ka Assam un sa bynshet ia ka jingkitkhlieh na ka bynta ki Regional Committee bapher bapher. Hadien ba la dep thung ia ki briew bad ki Chairmen jong ki Committee kila don, khlem pep baroh artylli ki Sorkar bad kumjuh ruh u Myntri Rangbah ka Assam bad ma nga, ngi la kwah ban iashong bad iakren ia kane ka kam kham kloi kat kaba lah” ula ong.
Haba pyniapher ia ka rukom pyniaid iaki jingiakren bad ki snem bala leit, u Conrad ula ong “Shibun kiei kiei kilajia haka lynti kaba dei. Ladangi khmih ia ki 50 snem bala leit,kiba dei ki snem ba shu pulom lut, hangno kin iakynduh ban iadih sha bad ong “pynneh ia ka status quo” iadih sha bad wan phai noh-kane ka dei kaba pulom, lada phi kylli ia nga”.
“Kaei kaba ngi leh ka dei kaba tei bad jam ha ka lynti kaba dei bad ngi la pynbeit shisha ia ki jingeh” ula bynrap.
Halor ki Committee ba thymmai, ula ong ba kine ki Committee kin pynbteng biang ia ki kam na kaei kaba ki committee barim kila sangeh.
