Shillong, June 30: Ka Ophis jongka District Social Welfare Officer, East Khasi Hills District kala pynlong ia ka jingiakob ialehkai football kaba shi sngi ha RUFC Performance Centre, Lumshyiap, Shillong, kum shi bynta jong ka jingrakhe ia ka International Day Against Drug Abuse and Illicit Trafficking 2026 bad Nasha Mukt Bharat Saptah 2026.
Ia kane ka lympung ialehkai la pynlong ha ryngkat ka jingiatreilang bad ka Inter Rehabilitation and Counselling Centre, Rangdajied United Football Club (RUFC), Manbha Foundation, New Hope Foundation, New Life Centre bad Kripa Foundation.
Ia kane ka prokram la pynlong hapoh ka mat “Nasha Mukt Bharat Abhiyaan – Viksit Bharat ki Pehchaan,” da ka jingthmu ban kyntiew ia ka imlang sahlang kaba lait na u droks lyngba ki jingpynsngewthuh, ka jingai jingsumar bad ka jingiadon bynta khamtam eh bad ki samla.
Haba kren ha kane ka sngi, Dr. Ghosh, In-charge ka Kripa Foundation ODIC, la pynpaw ia ka jingkongsan ha kaban ioh ia ka jingsuamr sukher, jingiasyllok bad ka jingkyrshan na ka shnong ka thaw ha kaban iarap ia ki riewshimet ban lait na ki jingdih kiba sniew bad ka jingseisoh ha kaban pyniasoh bad ka imlang sahlang.
Ka Additional Deputy Commissioner ka East Khasi Hills, kong D. Kharshiing, kala iaroh ia ki nongpyniaid ia kane ka prokram ban ai jingpynsngewthuh shaphang ka jingma na ka jingpyndonkam ia u droks. Kala pynshlur ia ki Rehabilitation Centre ba kin bteng ha kaban kyntiew ia ki jingialehkai bad kiwei kiwei ki kam kiban tei kum ka lad ban iarap ia ki riewshimet ban kin im ia ka jingim kaba koit ba khiah, kaba don jingmut bad ban im ka jingim kaba lait shi syndon na ka jingkyrni.
Ha kane ka prorkam, la sam ruh ia ki khusnam ia ki nongjop ha ka Reel Competition, u Rev. E.C. Marwein u Director jongka New Life De-addiction Centre, ula aiti ia ka song tyngka bad ka sertiphiket sha ki nongjop.
U Joel Kharshiing ula wan ba nyngkong ula ioh pdiang ia ka T.8,000 bad ka sertiphiket, u Rishot Baskhem Kharlyngdoh ula wan Baar bad ioh pdiang T. 5,000 bad ka sertiphiket, katba u Ethan Greovani Lyngdoh Mawphlang ula wan balai ula ioh ia ka T.3,000 bad ka sertiphiket.
Ha ka jingiakob ialehkai football, ka New Hope Centre kala iohrah ia ka nam lahduh ha ka liang ki kynthei da kaba pynrem ia ka Kripa Foundation. Ha ka liang ki shynrang, ka New Hope Centre kala pynrem ia ka Manbha Foundation ban ioh ia ka nam lahduh.
Ki nongpyniaid kila pynpaw ia ka jingkyrmen ba kum kine ki sienjam kin iai bteng ban pynshlur ia ki samla ba kin pdiang ia ka rukom im kaba koit ba khiah, ban kiar na u droks bad ban noh synniang ha kaban tei ia ka imlang sahlang kaba lait na u droks.
