Arunachal | Jah rngai 9 ngut ba rong ka umsaw ia ka lieng ki nongleit iarap | Kiew ka jingiap sha 3 ngut ha Keyi Panyor

Guwahati, Jylliew 29: Ka jinglong jingman jong ka jingshlei um ha ka jylla Arunachal Pradesh ka la kylla kham shyrkhei ha ka sngi Nyngkong ha kaba hynniew ngut ki briew, kynthup ïa u Gaon Burah (u Rangbah shnong) jong ka Dambuk, ki la shah pyntip ba ki jah hadien ba kawei ka lieng pyllait im ka la shah rong noh ha ka wah Sisiri kaba la shlei bha ha ka district jong ka Lower Dibang Valley.

Katkum ki khubor, la ong ba kawei ka lieng plastik kaba la pyndap lyer kaba kit hynniew ngut ki nongpyllait im bad lai ngut ki briew kiba la dep ban pyllait im ka la shah ngat ha ka um kaba khlain bor bad ka la shah rong noh ha ka por ba ki dang ialeh ban pynlait im.

Ka bor pyniaid district ki la pyndonkam da ki lieng bad wat ban pyndonkam ruh da ki lai tylli ki hati ban pynkynriah ïa ki nongshong shnong kiba sahkut namar ba ka um ka dang kiew ha katei ka thaiñ.

Ki shipai jong ka Indian Air Force (IAF) ruh ka la ïadon bynta lang ha kane ka jingpyllait im, ha kaba ki liengsuiñ ki la pynlong ïa ka jingwad bad pyllait im naduh mynstep ha ka jingthmu ban wad ïa ki briew kiba jah bad ban pynkynriah ïa ki nongshong shnong.

Katei ka jingjia, ka dei hapdeng ka jingshlei um kaba la sar naphang ha kylleng ka jylla Arunachal bad ka Assam, hadien ka jingjur jong u slap.

Ha Assam hapoh ka district Dhemaji, ym duna ia ka 15 ngut ki briew, ryngkat bad jan 100 tylli ki jingri jingdup, ki la sahkut ha Koraibari Char, hadien ba ka jingkiew kynsan ka um jong ka wah Dikari, ka la pynshlei ia ki bynta ba heh jong katei ka wah.

Ki heh ophisar ki la ïathuh ba ka wah kaba la shlei bha ka la pynngam ïa ki jaka ba rit, ki ïing ki sem, ki surok bad ki lyngkha rep, kaba la pynduh ïa ka jingïadei sha ki katto katne ki shnong ha ka Jonai subdivision.

“Ki briew kiba sahkut naduh mynstep namar ka jingkiew stet jong ka um ka la pynlong ïa ki ban nym lah ban poi sha ki jaka kiba kham shngain,” ong uwei u heh sorkar.

Ka jinglong jingman jong ka jingshlei um ha Koraibari Char ka dang ïai bteng, ha kaba ka jingkiew jong ka um ka la pynmih ïa ka jingsyier ia ki nongshong shnong. Katto katne kiwei pat ki bynta jong ka Jonai ruh ki la shah ktah, kaba la pynlong ïa kiba bun ki longïing ban leit sha ki jaka kiba kham shngaiñ.

Ha kajuh ka por, ka jingiap na ka jingther ba kynsan kynsan u lap bah kaba la lynshop ha ka district Keyi Panyor ha Arunachal Pradesh ha ka 24 tarik jylliew ka la kiew sha ka lai ngut hadien ba ki nongpyllait im ki la sei ia ka met jong u briew uba la jah khatduh hajan 10 kilomitar shapoh wah na katei ka jaka ba jia ka jingshah lynshop ha ka sngi U Blei.
Ka jingther ba kynsan kynsan u lap bah ha Poosa ka la pynlong ïa ki jingshlei um bad ka jingtwa khyndew, kaba la rong noh ïa ki 18 tylli ki jaka sah briew jong ka colony ka NEEPCO bad ka la pynjulor jur ïa ki jingtei bad ki surok.

U Deputy Commissioner jong ka Papum Pare, u Lobsang Tsering, uba la jurip ïa ki kam maramot ha ka Sngi U Blei watla u slap u dang ïai bteng, u la ong ba ka jingjulor ka long kaba jur bad antad ba kan shim por palat ïa ka shi taiew ban plie biang ïa ka surok bah kaba la shah ktah.

Ki bor pyniaid district ki la ai jingmut ïa ki nongleit nongwan ban kiar na baroh ki jingleit jingwan ki bym donkam eh ha shilynter ka lynti Hoj-Potin namar ka jingbym skhem ka jaka bad ka jingma kaba dang bteng jong ka jingtwa khyndew.

Da ka jingbteng jong u slap ba khlem sangeh ha kylleng ki bynta jong ka Arunachal Pradesh bad Assam, ki bor pyniaid ki dang peitngor bha namar ki wah kiba la shlei, ki jingtwa khyndew bad ki jingtei kiba la shah pynjulor ki dang bteng ban wanrah ïa ki jingma kiba khraw ha kylleng ka thaiñ.