Kynnoh ba pynkhein ia ki Ain halor ka hok jaka
Shillong, Jylliew 29 : Haba kynnoh ia ka Shree Cement ba ka ialam bakla ia ki nongshongshnong bad kynnoh ruh ia ka jingiasuhbuit bad ki bor pyniaid shnong, ka Jaintia National Council bad Jaintia Students Union, kila pynpaw ban pynlong ia ka jingiatur paidbah sha JHADC ha u bnai ban dawa ia ka jingbishar hok na ka bynta ki nongrep bad ban weng syndon ia u Dolloi ka Elaka Nongkhlieh.
Kane ka rai kala mih na ka jingialang ba kyrkieh ba long ha ka sngi Saitjain ha Ophis ka JNC, ha kaba ki dkhot ka JNC Central Executive Committee bad JSU Central Body, kila iakynduh ia ki trai jaka, ki nongrep na ka shnong Daistong, u nongtrei kam bhalang Reachingson Siangshai bad ki nong shongshnong ka Elaka Nongkhlieh, East Jaintia Hills.
U President ka JNC Bah Sambormi Lyngdoh ula ong ba ka jingpyrshah ia ka jingthmu seng karkhana dewbilat ha Lum Syrman kam shym la kut hadien ba la pynsangeh ia ka Public Hearing ba 22 tarik Jymmang namar ka jingpyrshah u paidbah, ka Hima Sutnga Youth Federation, ka JNC bad ka JSU.
Haba shim ia ka jingialang ba dang shu dep baka long kaba jop, ula ong ba ki nongiashimbynta kila shem ba ka jingheh jong ka project ka kham palat ban ia kaei kaba la pynpaw pyrthei.
“Katba ia ki Nongshongshnong la pyntip ba ka project kan ieng ha ka jaka ba 217 hectare, ka jingiakren ka shem ba jaka baroh ban pyntrei ia ka project ka kut sha ka 652 hectare, ha kaba 217 hectare ka dei tang ka phase-I” ong u Bah Sambormi haba iakren bad ki nongthoh khubor.
Ula kynnoh ba “ki nongshongshnong ka Elaka Nongkhlieh kila shah ialam bakla ha ka Shree Cement bad ki agent jong ka, kiba don ka jingiadei kaba iajan bad ka Sorkar Jylla”.
Kat kum ka jingong jong u, ka Dorbar Elaka kham hashuwa kala rai ban pynieng ia ka karkhana ha “Lum Ryngksan” kaba jngai na ka shnong. Ia kane ka rai la pynkut noh hadien ba la pynkynriah ia ka project sha ka shnong Daistong, ula ong.
Ka jingialang kala rai ban ia iaid paidbah ha Jowai ha ka 14 tarik Naitung, ban ban iatur sha ka Ophis ka Jaintia Hills Autonomous District Council (JHADC).
U Bah Sambormi ula ong ba ka JHADC, kaba bat ia ka bor hapoh ka Sixth Schedule ban iada ia ka khyndew ka shyiap bad ki marpoh khyndew, kam shym la leh eiei halor kane. “Ka long kaba sngewsih ba ka JHADC kam shym la leh eiei halor kane ka kam” ula ong.
Ula pynpaw ruh ia kaei kaba u ong ba ka dei ka jingpynkhein kaba jur ia ka land record. Watla ia ki jaka ha Lum Syrmen la dep ban register, u Dolloi ka Elaka Nongkhlieh ula register biang ia kajuh ka jaka bad ka JHADC kala ai thymmai ia ki kot ki sla, ula kam.
“Kane ka dei ka jingpynkhein kaba shai ia ka hok jong ki nongshongshnong ka Elaka” ula ong.
Kane ka jingiakhih ba thmu ban pynlong kan don ia artylli ki bynta ki ban phaikhmat : ban pynioh ia ka jingbishar ba hok na ka bynta ki nongrep bad ki trai jaka bad ban dawa weng syndon ia u Dolloi namar ka jingkynnoh ba ula pynkhein ia ki kyndon ka District Council.
U Bah Sambormi ula kdew ba kat kum ka sanad ba ai ka JHADC, ka ong ba u Dolloi “um dei ban ai kano kano ka No Objection Certificate lane ka jingbit ban leh sorjamin lane ai pyndonkam ia kano kano ka jaka ne khlaw…sha kano kano ka kompani khlem da ioh jingmynjur na ka Dorbar Elaka bad na District Council”.
Ula buh jingkylli la ka JHADC kala ai ia kum kane ka jingmynjur. Nalor kane, ula dawa pyntreikam ia ka Jaintia Hills Autonomous District Act, kaba shah ia ka Council ban weng ia u Dolloi uba iuhroit ia ka hok ki paidbah lane ialam bakla ia ka Elaka. “Halor ka kam jong ka Shree Cement, kala shai kdar ba u Dolloi ka Elaka Nongkhlieh ula pynkhein ia kine ki kyndon” ong u Bah Sambormi.
