Nongpoh, Nailur 19 : Ka jingiakynad hapdeng ki nongshongshnong ka Maikhuli, Ri-Bhoi bad ki briew na Assam kala mih biang hynne ka sngi Saitjain hadien ba ki briew na Assam kila shna jingker bad khang tala ia ka lynti shnong kiba pyniasoh bad ka madan Shnong.
Kane ka jingiakynad kala jia ha ka por 10:30 baje mynsteo da ka jingwan rung ki briew na Assam ban ker siej ia ka lynti ban rung sha madan Shnong bad kawei pat ka lynti iaid paidbah nalor ka khang tala. La kynnoh ruh ba kala don ka jing pynpra ia ka kynroh skul bad ka jingker da kaba pyndonkam da ka kali puh shilum.
Kat kum ka khubor la iathuh, haba ki longkmie na Maikhuli kila iohi ia kane ka jingleh donbor, kila leit mar mar sha katei ka jaka ban iakren pynban kala mih ka jingiania kaba jur bad poi sha ka jingiakurup mar met hapdeng ki arliang mamla.
Hapdeng ka jingiakynad kaba jur, ki nongshongshnong bad ki Longkmie ka Maikhuli, kila mih paidbah bad kila leitban kyndang ia kine ki jingker bad ki tala.
Ki bor district haba ioh jingtip ia kane ka jingjia, kila phah mar mar ia ki Pulit sha ka thain ban tehlakam ia ka suk ka sain. Ki Magistrate ba kynthup ia u N Hajong, u Akash Marak bad M Marngar nalor u Addl SP P Baida, u OF ka Kharnapara bad Pillangkata kila poi sha kane ka shnong khappud ban pynjai jai ia u paidbah.
Ki nongialam sengbhalang ba kynthup ia ka FKJGP Raid Marwet hapoh ka jingialam u President Denis Nongrum, kila hiar sha katei ka shnong ban ai jingshngain ia ki paid Maikhuli.
Haba kren sha ki lad pathai khubor, ki nongialam ka Seng kila ai jingiaroh ia ka jingshlur jong ki longkmie ka Maikhuli, kiba la mih shakhmat ban iada ia u pud u sam ka Jylla bad ban khanglad ia ki briew na Assam ban kyntur pud.
Ki nongialam kaseng kila kyntu ruh ia ka Sorkar ban shimkhia mardor ha kaban pynbeit ia u pud u sam ba thikna ha Maikhuli bad ban pynkhlain ruh ia ka jingdon ki bor Pulit ha ka thain khnang ba kin lah ban ai jingiada ia u paidbah.
