New Delhi, Nailur 19 : U Myntri Rangbah ka Jylla Conrad K Sangma ula iashimbynta ha ka conference ba arsngi jong ki Finance Minister ki JYlla bad Finance Secretary halor ka “Financing India’s Journey towards Viksit Bharat” ha Bharat Mandapam, New Delhi.
Kane ka conference, bala pynlong da ka Ministry of Finance ha ka 18 bad 19 tarik Nailur, kala wanrah lang ia ki nongmih khmat na ki Jylla bad ki Union Territories ban iakren halor ki jingeh ha ka kam pisa pilain bad ki kam pynroi kiba donkam hala ki Jylla.
Ka jingiakren kala pynleit jingmut eh halor ka jingpynkhlain haba iadei bad ka jingpyndonkam ki Jylla ia ka pla tyngka, ka jingpynkylla ia ka rukom treikam ha ka rep ka riang, ka jingpynkylla ha ka kam pynmih bording, ka technology bad ka jingthew ia ka jingkiew ka ioh ka kot lyngba ka Gross State Domestic Product (GSDP).
U Conrad ula ong ba ki jingiakren ki long kiba iadei eh bad ki jingthmu ba kongsan jong ka Meghalaya ban kyntiew ia ka ioh ka kot hapoh ka Mission 10, ka jingthmu jong ka Jylla ban thaw ia ki lad ki lynti, pynkhlain ia ki jingtei, kyrshan ia ka kamai kajih bad sengkam, bad tei ia ka ioh ka kot kaba khlain bad kaba neh.
Ula ong ba ki rynsan kum kane ka conference ka ai ka lad ia ka Meghalaya ban ioh jinghikai na kiwei pat ki Jylla, ban iakren bad ki stad ki jhad bad wad ia ki lynti treikam kiba thymmai ha ka jingpynroi ia ka pla tyngka katba ka Jylla ka dang ialeh ban kynjoh ia ka thong 2032.
Ka conference ka shong bishar ruh ia ki kam ba kynthup ia ka jingbei tyngka shimet, GST 2.0 bad ki jingktah iaki Jylla, ki iew marrep, ka jingpynmih bording ba khuid bad ka jingpyndonkam ia ki technology ka juk ba mynta ha ka synshar khadar.
U Conrad ula ai khublei ia ka Myntri Pla Tyngka Nirmala Sitharaman bad kiwei ki nongkren bad ki nongiashimbynta halor ki jingkren ba ki ai.
