Shillong, Jylliew 23 : Hapdeng ki jingujor kiba bun na ka jingioh ia ki bill bording elektrik kiba heh palat liam bad ka jingthut ka jingsam bording, u Myntri Rangbah ka Jylla Conrad K Sangma ha ka sngi Ba-ar, ula bthah ia ki Ophisar ka Tnad MePDCL bad ka Francise Operator SAI Computer ba kin shimkhia ha kaban pynbha ia ka jingai jingshakri, bujli noh ia ki meter kiba la sniew bad ban tei pat ia ka jingshaniah jong ki nongthang bording ha ki jaka ba aiwai (franchise).
Haba pyniaid ia ka jingialang bishar kam ha State Guest House, Taraghar, Shillong, u Conrad ula ban jur ia ki kam ba iadei bad ka jingsam bording elektrik, ka rukom ai bill bad ka jingud jingnam jong ki nongthang bording ha ki jaka ba pyniaid ka SAI Computer hapoh ka jingpyntrei Distribution Franchisee jong ka Meghalaya Power Distribution Corporation Limited (MePDCL).
U Myntri Rangbah ula pynpaw ia ka jingsngewkhia halor ka jingpyrshah u paidbah ia ka jingheh palat ka bill bording bad ka jingthut ka jingsam bording, haba ong ba ki nongthang bording ki sngewkhia tang halor ka jingbym biang ka jingai jingshakri ba ki ioh.
“Ka bording elektrik ka dei kawei na ki jingshakri paidbah ba donkam bha namar ka ktah ia man ki thliew iing manla u bnai. Lada ki paidbah ki siew ia ki bill kiba heh bad kim ioh pat ia ka bording ba lah ban shaniah, kan don beit ka jingbitar” ula ong.
Ha ka jingialang, ka SAI Computer kala pyntip ia ka Sorkar ba kala ioh pateng ia ki jingeh kiba bun ha ka rukom pyniaid kam kynthup ka jingdon bun ki meter kiba la sniew, ki jingtei kiba la tynmen, ka jingthut ki transformer bad ki jingtan bording khlem da pyndait meter lem bad ka jingbym biang ha ka jingkhein ia ka jingdon ki nongthang bording.
Ki heh Ophisar kila ong ba bun bah ki nongthang bording ha ki jaka ba ai pyniaid ka kompani ki dei kiba hap hapoh ka kyrdan Below Poverty Line (BPL) bad ba bun ki meter ki dei kiba la sniew ha ka por ba shimti ka kompani ban pyniaid ia ki kam.
Haba bthah ia ka kompani ba kan shim ia ka lynti treikam kaba buh hakhmat ia u nongthang bording, u Conrad ula ong ba ka jingpynjanai ia ka jingsam bording, ka jingbujli ia ki transformer bad kyntiew kyrdan ia ki jingtei ka dei ban wan nyngkong eh.
“Ki paidbah kim tip mano ba ioh pateng ia ki jingeh. Ki kwah ia ka jingshakri kaba bha” ula ong haba kyntu ia ka SAI Computer ba kan kiar ha kaban tynrong khia kynsan kynsan ia ka bai boring na ki paidbah tad haduh ban da lah pynjanai ia ka jingai jingshakri.
U Myntri Rangbah ula kyntu ruh ban pynlong ia ki jingleit pynsngewthuh paidbah ba pyniadon bynta lang ia ki nongialam ka thain, ki nongialam balang, ki seng trei mon sngewbha bad ki kynhun bapher bapher, ban batai ia ki jingpynkylla kiba dang iaid bad ban leh eiei halor ki jingeh u paidbah.
U Chairman-cum-Managing Director ka Meghalaya Energy Corporation Limited (MeECL), Sanjay Goyal, ula pyntip ha ka jingialang ba bun tylli ki project tei jingtei kila nang iaid mynta hapoh ka Revamped Distribution Sector Scheme (RDSS), ba kynthup ia ka jingbujli ia ki meter kiba la sniew, ka jingkyntiew kyrdan ia ki transformer bad ka jingnang pynheh ia ki voltage.
Ia ka jingialang la pynwai da ka jingbthah ia ka SAI Computer bad ka MePDCL ba kin pynkhlain ia ka jingkyntiew kyrdan ia ki jingtei, pynsted ia ka jingbujli ia ki meter bad ki transformer kiba sniew bad ban aiti ia ka kaiphod ba man ka por sha ka Sorkar Jylla.
.){kind=link}