Shillong, Jylliew 18 : Ka Iingkashari Meghalaya High Court kala pynwai noh ia ka PIL ba dawa ban iada ia ka Laban Circuit House bala iatip kum ka Bidhan Bhavan, hadien ba ka Sorkar kala rai ban pynieng ia u mot bad mawthoh kyrteng jong u Dr bidhan Chandra Roy ha kane ka jaka.
Ka PIL, ka dei kaba la register halor ka shithi na ka Malabika Bisharad ba 12 tarik Naiwieng, 2025, kaba pynpaw ia ka jing sngewkhia halor ki khubor ba thmu pynpra ia kane ka jingtei kaba don ha Kenches Trace, Laban.
Ka Bisharad kala iasaid ba kane ka jingtei, bala tei ha ki snem 1920 da u Dr BC Roy, Myntri Rangbah ba-ar ka West Bengal, ka don ia ka khana pateng ba don dor bha bad ka dei kaba la leit iuhkjat da u Rabindranath Tagore bad Netaji Subhas Chandra Bose.
Ka Iingkashari ka Chief Justice Revati Mohite Dere bad Justice W Diengdoh kala shong bishar ia kane ka kam ha ka sngi Balang (17 tarik Jylliew).
Haba pynbud ia ka hukum ka Iingkashari ba 4 tarik Nohprah, 2025, ka Meghalaya Heritage Authority kala shong bishar ia kane ka jingtei.
Ha ka affidavit ba 25 tarik Rymphang, 2026, u Member Secretary ka MHA ula pyntip ia ka Iingkashari ba katba ka Raj Bhavan kala ioh ia ka jingithuh kum ka jingtei uba rim hapoh ka Meghalaya Heritage Act, 2012, ka Laban Circuit House kam shym la kot kat kum ki kyndon hapoh ka Regulation 6 jong ka Regulation ba 2013.
Hynrei,ka Authority kala ai jingmut ia ki sienjam ban shu kynmaw burom.
U Advocate General A Kumar ula aiti iaka kaiphod ba pynthikna ba yn pynieng ia u mot u Dr BC Roy bad ki maw thoh kyrteng ha ka kper jong ka Laban Circuit House.
“Naba ka Sorkar Jylla kala shim ia ki sienjam kumba la pynpaw, kaba hap ban iaroh shisha, ym don eiei shuh ban dang hap bishar halor kane ka PIL” ong ka Iingkashari kaba ai jingiaroh ia u Amicus Curiar S Chakrawarty namar ki jingiarap jong u.
