Shillong, June 18: Ka Tnad Forest ha ka sngi Palei kala leit khynra ia ki 4 tylli ki karkhana ot dieng ne Sawmill kiba treikam be-aiñ, ha ka thaiñ Bajengdoba bad Mendi ha North Garo Hills hadien ba kala don ka jingujor da katto katne ki kynhun sengbhalang.
Ia kane ka jingkhynra la leh, hadien ba ka Tnad Forest kala ioh pdiang ia ki jingujor ha ka 11 tarik u Jylliew na ki seng kiba kynthup ia ka Matgrik Do’mesal, APA, ADE, FKJGP, AYWO bad ASPF kiba la kynnoh ba ka jingtreikam jong kitei ki karkhana otdieng ka long kaba be-aiñ ha katei ka thain.
Katkum ka jingong u Chisaka Ch. Marak, Range Forest Officer in-charge jongka Darugre, Dainadubi bad Kharkutta Ranges, ka tnad kala leit pynshisha ia kitei ki jingtip bad kala iatreilang bad ki nongmihkhmat jong kitei ki sengbhalang ban pynshisha ia katei ka jingkynnoh lyngba ki jingujor hashwa ba kan pynwandur ia ka jingkhynra.
Da kaba shimkhia ia ka jinglap, ki nongtrei ka tnad Forest na Dainadubi, Kharkutta, Darugre bad Simsanggre Ranges kila leit khynra ha ka sngi Palei. Kane ka kynhun kala leit shwa sha ka thain sha ka thaiñ Bajengdoba shwa ban pynlong ia ka jingkhynra ha kitei ki 4 tylli ki karkhana otdieng kiba don ha kylleng ki jaka.
Ha kane ka jingkhynra, ki ophisar kila kurup ia katto katne tylli ki mashin bad ia ki tiar ki tar kiba pyndonkam ha kaban ot dieng. Kala don ruh ka khep ba ki nongtrei kila pyrshang ban phet krad ban lait na ka shah pynsajia bad kila pynduh noh ia ki mashin bad ban buhrieh ia ki tiar ki tar kiba kongsan. Hynrei ki nongtrei ka tnad Forest kila lah ban lapdien noh ia kine bad kila kurup noh ia kitei ki tiar ki tar kiba lah buhrieh.
La khmih lynti ba ka tnad Forest kan shim ia ki sienjam nangne shakhamt da kaba pynngat katkum ki kyndon aiñ.
