Khliehriat, Jymmang 28 : U Myntri Rangbah ka Jylla Conrad K Sangma, ha ka sngi Palei, ula buh ia u mawnongrim jong ki saw tylli ki project shna surok ha madan ialehkai Latyrke, East Jaintia Hills, ki ba shongdor kumba T.488.23 klur.
Had the privilege of laying the foundation stones for three major road infrastructure projects at Latyrke Playground, East Jaiñtia Hills District, with a total investment of approximately ₹412 Crore.
These projects will significantly improve connectivity across the region, from… pic.twitter.com/ZisrGbWTBV
— Conrad K Sangma (@SangmaConrad) May 28, 2026
Kine ki project ki dei kiba la bei tyngka da ka World Bank hapoh ka Meghalaya Logistic & Connectivity Improvement Project (MLCIP), ka Central Road Infrastructure Fund (CRIF) bad ka SIDCI Cluster Development Fund ka Sorkar Pdeng.
Ka project jong ka World Bank ka kynthup ia ka jingpynheh ia ka surok Dkhiah-Sutnga-Saipung-Pala haduh-Semmari na ka 30.10 km ha ka 58.10 km (jingjrong=28 kms) ba shongdor T.355 klur.
Ka project ka CRIF ka dei ka jingpynbha bad pynkhlain ia ka surok Dkhiah-Sutnga-Saipung-Maulsei-Haflong (Ch. 43+200 to 52+000 km) [jingjrong = 8.8 Kms] kaba la mang T. 10.3 Cr.
Kawei pat ka project ka dei ka surok sha Kshaid Chympe na Siejrongheng nalor ka jingpynbha ia ka surok Sutnga-Khaddum (jingjrong= 10.7+12+ 22.7 kms) bad ka dor jong ka project ka long = 46.75 klur bala dei da ka SIDBI Cluster Development Fund (SCDF) bad ka project na Shkemtalang (NH-206) sha surok Lumshyrmit ba kynthup ia ka Jingkieng bah ha Wah Myntdu, kaba pyniasoh ia ka NH-6 ha Kongong bad ka dor jong ka project ka long T. 76.43 klur ba 18.64 km bala bei tyngka da ka NSEIDS.
Kiba iadonlang ha kane ka sngi ki long u Symbud Myntri Rangbah Bah Sniawbhalang Dhar, MLA ka thain Kong Santa Mary Shylla bad Bah Kyrmen Shylla, ki Waheh Shnong na Latyrke bad Lumshyrmit nalor ki Heh Ophisar ka Tnad PWD (R&B) bad ki heh na ka bor district. Ka jingkynshew tyngka baroh lang jong kine ki saw tylli ki project ka long T.488 klur ba jrong 108.24 km ha East bad West Jaintia Hills.
Haba ai jingkren, u Myntri Rangbah ula pynpaw ia ka jingkmen haba pynbna ia ka jingbuh mawnongrim ia ki project kiba heh bala bei tyngka da ka World Bank na ka bynta ka East Jaintia Hills bad ong ba kine ki project surok kin nang pynkhlain ia ki lad pyniasoh ha ka thain haba kyntiew ruh ia ki kam kamai kajih bad pynsuk ban ioh ia ki jingahakri kum ha ka koit ka khiah bad ka pule dangle.
Haba iaroh ia ka jingtrei shitom ka MLA ka thain bad ka jingaiti lut sha ka constituency khamtam ha kaban iasaid na ka bynta ki project surok, u Myntri Rangbah ula pynbna ba ia ka tender jong kine ki project surok lah dep ban khot bad la khmih lynti ba ki kam kin sa sdang noh hapoh ka 45 sngi.
U Myntri Rangbah ula aiksai ruh ia ki jingtei kiba heh bad ki project lad pyniasoh ki ban sa pyntreikam ha ka thain hynrei ula ban jur ia ka jingkongsan ban shim ia kiei kiei kawei hadien kawei bad ban pyniadonbynta lang ia baroh ha ka kam ban shim rai.
Haba kren halor ka jingkhang tih dewiong kaba la ktah jur ia ka kamai kajih ha ka thain,ula ong “Ka Sorkar kala trei khlem sangeh ban weng noh ia ka jingkhang tih dewiong bad ka jingsdang tih dewiong kat kum ka juk saian” bad ban jur ia ka jingkut jingmut ka Sorkar ban pyndep ia ki jingdonkam kat kum ki ain ba ki lynti ba dei ban leh haba kyrshan ia ka kam tih par.
Halor ka jingkyrshan ia ki nongtih par kiba rit ba ria bad ban weng ia ki jingeh ba ki mad, u Myntri Rangbah ula ong “Ka jingiakren bad ka Sorkar India ka dang iaid ban pynthikna ia ka rukom tih par kaba neh” bad ban jur ia ka jingkongsan ban pynbiang tarajur ia ka jingdonkam ki nongtih par kiba heh bad kiba rit ban lah kynjoh ia ka jingiai neh kaba slem. Ula pynpaw ia ka jingkyrmen ban shem ia ki lynti ki ban pynmyntoi ia ki nongtih par bad ka mariang.
U Myntri Rangbah ula pynbna ia ka jingkyrshan ban tei ia ka Indoor Stadium ha Latyrke kumba angnud da ki nongshong shnong jong ka thain.
Ha shnong Lumshyrmit kaba la buh ia u mawnongrim jong ka surok Shkemtalang (NH-206) sha Lumshyrmit bad ka jingkieng ha Wah Myntdu, ba pyniasoh ia ka NH-06 bad Kongong, ula pyntip ba kane ka project ka plie ia shibun ki lad ia ki trai shnong kynthip ki kam jngohkai, ka rep ka riang bad ki jingdonkam ba man ka sngi kum ka pule dangle bad ki jingai jingsumar.
