Shillong, Jymmang 26: Da ka jingmad ia ka jingduhnong na ka jingsaphriang ka khlam jingpang African Swine Flu, ki nongri sniang ka jylla Meghalaya kila kyrpad ia ka sorkar jylla ba kan map noh ia ka ram kaba kila shim na ka Piggery Mission bad ban shim ia ki sienjam ban iada ia ki nongrep kiba pynmih ia ki jingri.
Ka Federation of Piggery Farmers of Meghalaya kala leit iakynduh ia u Myntri Sorkar uba khmih ia ka tnad Animal Husbandry & Veterinary u Bah Sanbor Shullai hynne ka sngi Baar, ban aiti ia ka dorkhas halor katei ka jingmad jingeh ka jongki. Ia kane ka kynhun la synranlang da u MLA ka Mawkynrew u Bah Banteidor Lyngdoh.
Ka Federation kaba mihkhmat na ka bynta 400 ngut ki nongrep bad ka jingdon ki dkhot kala nang iai kiew.
Haba iakren bad ki nongthoh khubor, u Secretary jong ka Federation u Bah Napoleon Mawphniang ula ong, bun ngut ki nongrep kila shim ia ka ram kaba T.15 haduh T.20 lak hapoh jongka State’s Piggery Mission ha u snem 2022-2023 ban pynheh ia ka kam ri jingri. Hynrei ka jingsaphriang ka khlam African Swine Flu kala shim lut ia ka jingim jong ki jingri baroh bad pynlong ia katei ka ram kum ka jingtim jingtla.
“Bun kila pyrkhat ba katei ka ram kala long ka jingkyrkhu, hynrei haba ka khlam
African Swine Flu kala wan sar, bun kila kylla kum ki nongmad ia ka jingeh kaba khraw na ka jingshim ia katei ka ram” ula ong.
“Mynta ki sniang kila iap lut, hynrei ki Bank kila phah siew ia ka pisa kaba la shim ram. Ki nongrep kim tip ia kaei kaba kin leh. Bun kila khuslai bad bun kila sngew kutlad”.
Ula banjur ba katei ka jingpang kadei kaba la buh ha ka jingma kaba khraw.
“Na ka liang jong ka Federation, ngi dawa ba ka sorkar kadei ban shimkhia ia ka khlam African Swine Flu, kaba dang iai bteng haduh mynta”.
Nalor ka jingpang, ki nongrep kila hap ruh ban iakhun ia ka jingwan rung jong ki sniang kiba nabar kiba na ka jylla Assam, Punjab bad kiwei kiwei ki jylla.
“Ki nongrep ha ki shnong kila mad ia ka jingeh namar ka jingbym tehlakam ia ki iew ki hat. Ki sniang kiba la wanrah na shabar ki iakhun bad ki sniang kiba la pynmih hapoh ka jylla” ong u Bah Mawphniang.
“Ka shim por ia ngi haduh shisnem shiteng ban ri ia u sniang, katba ki sniang kiba wanrah nabar ki shimpor tang 5 ne 6 bnai. Ngi lah shem jingeh ban iakhun bad ki”.
Ula pynpaw ruh ba ka jingbym don kyrdan ia ka dor jongki sniang ha ki iew ki hat.
“Ha kaba iadei bad ka syiar, ngi don ia ki syiar Broiler bad Croiler. Hynrei ha kaba iadei bad ki sniang ngi don beit thik tang ia kawei ka dor. Ka don ka jingeh na ka bynta ki nongrep ia ki sniang”.
Ka Federation kala kyntu ia ka sorkar ba kan map noh ia baroh ka ram kaba la shim lyngba ka Piggery Mission. Kala tyrwa ruh ia ka polisi ban thied ia ka dohsniang na Meghalaya ne ‘Buy Meghalaya Pork’ ban kyntiew ia ka jingdawa ia ka doh sniang bad ban pynbna ia ka Non-Refundable Relief Grant kaba T.10 lak ia uwei pa uwei u nongrep khnang ba kan long ka jingiarap ba kin lah ban sdang biang ia ka kam ka jongki.
Katkum ka jingong u Bah Mawphniang, u Myntri Sorkar ula pynthikna ia ka kynhun ba yn shimkhia ia kane ka mat bad yn sa lum ia ka jingialang ha u bnai ban wan ban shimkhia ia kane ka mat kaba kila pynpaw.
