Shillong, Jymmang 26 : Ka Rymbai Shkenshynriah SC bad ka Langsning FC ki la jam sha ka semifinal jong ka 5th Meghalaya State League, ka Meghalaya Football Assoiciation hadien ba kila pyndep da ka jingjop iaki jingiakhun ba khatduh ka quarterfinal league stage, ba llong ha madan ka SSA Stadium, hynne ka sngi Ba-ar.
Ka Rymbai Shkenshynriah ka donkam ia ka jingiakhaid ba kan jam sha ka semifinal, pynban kane ka kynhun ka la lah ba kan pynliem syndon haduh 5-2 pyrshah ia ka Nangkiew Irat FC, bad kine ki kol baroh kila wan ha ka kylla miet.
Ia ki san kol ka Shkenshynriah la thep da u Iaishah Bareh (56′), Hesmiki Rymbai (69′, 90’+3), Niponghi Sumer (77′) bad Harita Suchen (90’+4).
Katba ia ki ar kol ka Nangkiew Irat FC la thep da u Brolington Warlarpih (58′) bad Justerwell Tham (81′).
Ha shwa jong kane ka jingiakhun, ka Langsning FC ka la pynskhem ialade ba kan bat ia ka kyrdan ba nyngkong na ka Group B da ka jingpynliem ia ka Maram FC da 2-0 bad ia kine ki kol la thep ia ki da Donlad Diengdoh (41′) bad u Nelson Rymbai (48′), ha baroh ki ar kylla jong ka jingiakhun.
Ka Langsning FC ka jam sha kane ka kyrdan iakhun hadien ba ka la lah ba kan khur 5 tylli ki nam jop bad shah rem shisien bad khur 15 point, katba na ka liang ka Maram FC kan dei ka namrem ba hynriew sien lynter.
Kane ka kynhun kan kit shibun ki jingmyntoi kum shi bynta ka jingpynkhreh ba kan iakhun naka bynta ban rah biang ia ka nam kum ka lahduh ka Tura Super Division, kaban sa sdang noh shen.
Ka jingiakhun jong ka semifinal kan long ha ka 29 tarik Jymmang ha kaba ka Nongkseh SSCC kan mih madan ban iakhun pyrshah ia ka Rymbai Shkenshynriah.
Ka Langsning FC kan iakhun pyrshah ia ka Shillong Lajong FC ha ka 30 tarik Jymmang bad kine ki jingiakhun kin long ha ka por 6 baje janmiet ha SSA Stadium, Polo.
