Shillong, Jymmang 27: U Myntri ka Sorkar Jylla bad u MLA ka Jowai u Bah Wailadmiki Shylla ula pynshai halor ki kam pynroi kiba la leh da ka sorkar MDA ha rilum Jaintia bad ong, ba ka Meghalaya ka donkam ia u MP uba lah ban shimkhia thikna ia ki mat kiba kongsan jong ka jylla hapoh Delhi” haba ialap elekshon na ka bynta u kyrtong ka NPP u Dr DRL Nonglait na ka bynta ka elekshon shiteng samoi jongka MP Lok Sabha na Shillong Constituency.
“Ka MDA kadei ka sorkar kaba sngap ia ki paitbah bad kaba sngewthuh ia ka jingeh kaba ki mad” ong u Bah Shylla ha ka jingialang kaba la long ha Chilliangraij Dorbar Hall ha ka Sngi Nyngkong.
“Peit ha kylleng jong ka Jaintia Hills mynta, ki surok kiba thymmai ha kylleng. Ym tang hapoh Nartiang ne Jowai, hynrei ha man la ki Constituency.”
U Bah Shylla ula ong, ba la bhah T.23-24 Klur ban kyntiew ia ka Kiang Nangbah Stadium bad mynta la sdang ban tei ia ka jaka lehkai Athletic. Lah dep ban shna ia ka Football Turf ha Amlarem, Khliehriat bad Shangpung bad ki projek ha Mukhla Sohshrieh, Wapung bad ha Sutnga kidei kiba lah jan dep artad.
Ka jingpynlong ia ka Meghalaya Games kala wanrah ruh ia ka jingkyntiew ia ka
Chilliangraij Indoor Hall, ka MDC Hostel bad Jowai Polytechnic.
Ula kyrpad ruh ia ka jingkyrshan ia ka Thomas Jones, Nongtalang, Shangpung bad East Jaintia Community College bad ia ka Government College kaba la mang ha ka shnong Jalaphet.
“Kham hashwa, ki nonghikai kila mih ban pyrshah shabar jong ka Secretariat. Mynta phin ym iohi shuh ia kum kitei ki jingiakhih namar ba ka sorkar kala dep ban ai ia ka tulop kaba ryntih” ula ong.
Halor ka koit ka khiah, T.5 Klur kadei kaba la dep bhah ban kyntiew ia ka Ummulong CHC sha ka Integrated Hospital.
U Bah Shylla ula iaroh ruh ia ka sorkar ban sdang ia ka Shillong Medical College, kaban pynmih 50 ngut ki doctor man la ka snem bad la khmih lynti ba ka Tura Medical College kan kyntiew sa palat 150 ha une u snem.
“Hynriew ne Hynniew snem mynshwa, ka Mang Tyngka ka jong ngi ka long tang T.13,000-14,000 Klur. Mynta ka long T.30,000 Klur” ula ong.
Da kaba banjur ia ka jingdonkam ia u MP, ula bynrap, “Ngi donkam ia u MP lajong ha Delhi ban buddien ia ki jingdonkam jong ka jylla, khamtam ha kaban pynrung ia ka ktien Khasi ha ka Eighth Schedule. Ka ïingdorbar da kawei ka sur kala mynjur ia ka Resolution, hynrei ka jingai jingmynjur kan shong beit ha ka Sorkar Pdeng”.
“Ki nongmihkhmat kiba la shah jied kim lah tang ban shu kren. Phi lah jied ia ngi bad trei bad ban pynurlong ia ki kam pynroi. Dei halor kane, ngi donkam ia u MP uban shimkhia ia kane ka mat bad ka Sorkar Pdeng” ula ong.
U Bah Shylla ula ong, ba ka jinglong jingman jong ka kam saiñ pyrthei kala ai ia ki jylla kiba rit ia ka lad kaba biang. “Ka BJP mynta kala don ha ka khim khait. Uwei na ki MP ki jong ngi ruh ula don ia ka bor. Dang shen kila pynkhreh da ka liengsuin (jet) shimet ia u MP ka Rajya Sabha ban vote halor ka Bill kaba kongsan. Lada phi jied ia u Dr Nonglait, ngi ngin don 2 ngut ki MP ha Delhi.”
Haba kren halor ka Job Reservation Policy ka long ka mat kaba sngewkhia bha bad ula ong, “Mynshwa ki Khasi, Jaintia bad Garo kila ioh ia ka 80%. Mano ban shah ktah lada jia ba kane ka shah pynhiar noh sha ka 50%? Ka kynhun myntri ka dang iakren ia kane. Ngi ngim lah ban shu rah ia kane sha surok”.
Ban kyntiew ia ka kam jngohkai, la bhah ia ka pisa ban tei ia ka Convention Centre ha Mukhla.
Ula pynbna ruh ia ka Nursing College kaba nyngkong ha West Jaintia Hills, ha ka T.2 Klur la dep ban ai jingiarap ia ka Thomas Jones College bad T.2 Klur ia ka Dr Tunnel Hospital, ka jingai jingiarap kaba ha ka sien kaba nyngkong ia ki hospital shimet.
Ula ong ba ka Jowai Municipal Board, shisien ka por kala long ka bym lah ban treikam bha, mynta kala siew ia ka tulop ha ka por bad pyniaid ia ki SHG Scheme. Ki Dorbar Shnong mynta ki ioh T.5 Klur na ka tnad Urban, na kaba ki ioh mynshwa tang T.30 lak.
U Bah Shylla ula pynpaw ba ka Jowai Water Supply Scheme, B.Ed College ha Kiang Nangbah College, Mother and Child Hospital bad ka Iawmusiang Market — kaba la bhah T.20 Klur kadei kaba lah jan dep artad bad ki projek kiba lah sahteng kidei kiba la pyndep ha ka por jong ka sorkar MDA. Ia ka Mini Secretariat ha Jowai yn sa plie noh shen.
“Ka polisi ka jong ngi ka long ban kren tang khyndiat hynrei ban trei pat kham bun” ong u Bah Shylla ryngkat bad ka kyntu ia ki nongthep vote ban kyrshan ia u Dr Nonglait.
“Haba u jop, sngewbha kynmaw lem ia ka Jowai constituency, namar ba ngi ngin donkam ia u ba yn iarap bad ban btin ia ngi”
