Iakynduh u CM ia u Dharmendra ha Delhi | Batai ia ki jingtynjuh ba mad ka Jylla ha ka kam pule puthi

Delhi, Jymmang 26 : U Myntri Rangbah ka Jylla Conrad K Sangma ha ka sngi Nyngkong, ula ai ia ka jingbatai kaba bniah halor ki jingeh bad ki lynti iaid (roadmap) ban pynbha ia ka Performance Grading Index (PGU) jong ka Jylla ha u Myntri ka tnad Pule Puthi ka Sorkar Pdeng Dharmendra Pradhan.

Haba mynjur ba ka jingtreikam jong ka Jylla kala don ha ka kyrdan ba hatrai duh ha kine ki lai snem bala leit, u Myntri Rangbah ula ong ba ka Tnad Pule Puthi kala lap bad ithuh ia ki jingduna ha ki jingmih na ka pule dangle bad kala shim ruh ia ki sienjam ban weng ia kine ki jingeh naduh tynrai.

Ula pyntip ia ki jingeh haba iadei bad ki jingtei kiba la ktah ia ka jingmih jong ka pule puthi, kynthup ia ka jingdon bun palat ki skul, kaba la lam sha ka jinghap pynbynta ia ka jingdon jingem ban pyntreikam, ka jingbun kyrdan ki grant-in-aid, ka jingkyllain ha ka jingpyniaid kam, kaba la don da ki phew snem.

Napdeng ki hynriew tylli ki Jylla ka thain Shatei Lam Mihngi lait noh ka Assam, ka Meghalaya kaba don kumba 30 lak ki nongshongshnong ka don jan kot 14600 tylli ki skul, kaba hehduh haba ianujor bad ki Jylla kum ka Manipur, Mizoram, Arunahchal Pradesh bad Tripura.

Ula pyntip ba kine ki daw kala ktah ia ka jingpynleit jingmut na ka jingpynbha ia ka jingmih na ka pule puthi, bad ka Sorkar kala shim mynta ia ki sienjam, ki ban pynbha ia ka pule puthi hapoh ka Jylla.

Ula pyntip baka Sorkar kala shim ia ki sienjam kaba khraw ban pyniasoh lang ia ki skul bad ban pynbiang ia ki jingtei. Kane kan pynthikna ia ka jingpyndonkam ba kham bha ia ka jingdon jingem, jingpynbiang ia ka jingkhein hapdeng ka jingdon ki nonghikai bad ki khynnah skul, bad ka jinglah ban pynioh ia ki jingdonkam kum ki Laboratory bad ki kor digital.

Ula pyntip ruh ba ka Jylla kala pynbeit ryntih ia ka rukom ai ia ki grant-in-aid ba bun jait ban pynduna ia ka jingkit ba khia jong ka Sorkar, ka ban pynlah ha ka jingpynleit jingmut ba kham bun sha ka jingbha ka pule puthi bad ka jingmih.

Ula batai ruh ia u Myntri ka Sorkar Pdeng halor ka sienjam ba kongsan jong ka Sorkar halor ka jingpyntreikam ia ka rukom siew bainong kaba long mar katjuh, kynthup ka jingsiew bala pynbeit ryntih na ka bynta ki nonghikai SSA. “Kane ka jingpynkylla ka thmu ban wanrah jingiaryngkat, ban ai mynsiem, bad ban pynkhlain ia ka jingkitkhlieh hapdeng ki nonghikai” ong u Myntri Rangbah.

U Myntri TRangbah ula pyntip ruh halor ka jingai jinghikai pyntbit ia ki nonghikai bad ki prokram pynroi, kaba long kongsan ha kaban pynthikna ia ka pule puthi kaba bha hapoh ka Jylla.

Kiwei pat ki sienjam kiba la pynpaw ki kynthup ia ka jingpyntreikam ia ka NEP three language formula, ka jingpynlong kongsan ban pule ia ka ktien Khasi bad Garo, yn ym don eksamin tad haduh klas 2, ka jinghikai da ki jingïalehkai bad ka jingwad jingtip bad ki kot pule kiba la pynbeit ha ka jinglong tynrai, ka sngi bym donkam rah plakot ba pud sngi na ka bynta ki khynnah rit bad ym donkam kot pule na ka bynta ki pre-school bad tang ki tiar ai jinghikai na ka bynta ki nonghikai.

Halor ka jingpynbeit ia ki skul LP, ula pyntip ba napdeng ki 14582 tylli ki skul, 3198 tylli ki skul lah dep ban pyndam noh na ka bynta ka jinglah pyndonkam bha ïa ki jingdon jingem.

Ula air uh ka jingbatai kaba bniah bha halor ka “CM LEAD Fellowship”, kaba dang shu pynlait dang shen. Kane ka dien ka prokram ban pynkhlain ia ka jinglah ban pyntreikam bha ia ki kam ha ka pule dangle. Da kaba buh ia ki riewshemphang kiba tbit ha ki District, kan iarap ha ka jingpynwandur ia ki plan, ka jingiatreilang bad ka jingkhmih bniah ia ki jingpynkylla kiba kongsan. Hapoh kane ka prokram, 12 ngut ki riewshemphang yn buh ha ki 12 tylli ki District jong ka Jylla.

Kiwei pat ki jingtuklar ba kongsan bala shim da ka Sorkar ki kynthup ia ka jingbuh ia ka Meghalaya Teachers Training Academy (MTTA), ka academy ban ai jinghikai beit thik tang ia ki nonghikai na ka bynta ban pynbha ia ka jingpynroi ba iai bteng ia ki sap hikai hapoh ka Jylla.

Ka MTTA kan pyntreikam ia ka bynta ka jingai jinghikai ia ki Nonghikai jong ka Samagra Shiksha.