Phah siew ia ka pisa ba palat T.3000 klur na ka khajna ka Hima ba phra snem
Shillong, Jymmang 22 : Ka Khasi Hills Autonomous District Council (KHADC) ba synshar da ka Voice of the People Party (VPP), kala sospon ia u Syiem ba pura ka Hima Mylliem Ainam Manik Syiem, namar ka jingbym siew ka Hima ia ka bhah khajna ba 1/8 sha ka Council mynta la phra snem kaba kot palat T. 3000 klur nalor ka bhah khajna ba 10% na ki iew bala lum da ka Hima ha ki lai snem bala leit.
Ka bhah khajna ba 10% na ki Iew bad ka bhah 1/8 na ka khajna ba iohlum ka Hima, ka dei ka bhah ba ka KHADC ka ju lum na ki Hima/Elaka kiba don hapoh u pud u sam ka KHADC.
Kane ka jingkhyllie ka KHADC ia ka khajna jong ka Hima Mylliem, ka dei ka dak kaba pyni ba ka Council ka thmu ban khyllie ia kiwei pat ki Hima khamtam ki Hima kiba heh bad ba riewspah kum ka Hima Langrin, Maharam, Nongstoin, Nabosohphoh bad kiwei kiwei.
Haba iakren bad ki Ophisar ka Council (ki bym kwah pynpaw kyrteng), kila ong ba baroh hi ki Hima/Elaka kim ju siew thikna ia ka bhah khajna jong ki iew khamtam eh ka 1/8 share.
“Mynta kiba bun ki Syiem kin sa hap na ki khet bad bun ki Hima/Elaka kin sa ioh da ki Acting Syiem/ Acting Sirdar/Acting Wahadadar/Acting Lyngdoh bad ter ter” kila ong.
Haba batai ia ki daw ka jingsospon ia u Syiem ka Hima Mylliem, kila ong ba une u Syiem (Ainam Manik Syiem) u khlem lah ban siew ia ka bhah khajna ba 10% ba lum na ki Iew sha ka Council-kaba dei na ka bynta u snem mang tyngka 2022-23, 2023-24 bad 2024-25 kaba long kat kum ka kyndon 11 (5) jong ka Khasi Hills 9Establishment, Management and Control of Markets) Regulation Act, 1979.
Ka jingsospon ka long ruh halor ka nongrim ba u Syiem u khlem lah ban siew ia ka bhah 1/8 na ki khajna b alum da ka Hima kaba kot haduh T. 3,24,85,020,625 jong u snem mang tyngka 2018-19, 2019-20, 2020-21, 2021-22, 2022-23, 2023-24 bad 2024-25 katkum ka kyndon 9 jong ka Sanad.
Ha ka jingpynbna ba sospon ia u Bah Ainam Manik Syiem kum u Syiem ka Hima, ka KHADC kala pyntip ba kala thung ia u Alban Fedrick Syiem kum u Acting Syiem.
Ka KHADC kala bthah ruh ia u Bah Ainam ba un aiti noh ia baroh ka pisa, ki kot ki sla bad baroh kiei kiei kiba dei jong ka Hima Mylliem sha u Acting Syiem.
Ka khubor ka iathuh ba u Bah Ainam u lah ban tynjuh pyrshah ia kane ka hukum ka KHADC sha Iingkashari.
