Shillong, Jymmang 22 : Ka Nongkseh SSCC bad ka Shillong Lajong FC kila ioh bat ia ki artylli ki jaka ha ka semifinal na ka Group A hapoh ka 5th Meghalaya State League, da kaba jop ia ki jingiakhun quarterfinal league stage hynne ka sngi Thohdieng.
Ka Nongkseh kala pynliem da kaba suk ia ka kynhun ba shah tdong eh jong ka Group-ka Rangdajied United da 4-1 kol.
Ka jingiakhun hapdeng ka Shillong Lajong bad ka Mawlai SC ka long kaba itynnad bad iakhaid bor bha hynrei dei ka kol u Fridison Wanniang kaba wan ha ka minit ba 72, kaba la pynioh ia ka jaka ia ka Shillong Lajong ha ka semifinal bad pynthikna ruh ia ka jingkut noh ka lynti iaid jong ka Champion u snem bala lah-ka Mawlai SC.
Kat kum ka jingkamai point, ka Nongkseh kala ialam ia ka Group da ka jingioh kamai 11 point, bud sa ka Lajong kaba ioh 10 point, ka Mawlai SC-7 point bad ka RUFC ka dang bam da u brut.
Wayla ka dang don sa mar shisien ka jingakhun, ka jingliem arsien kynthih ha ka Lajong ka mut ba ka Mawlai, haba pynshong nongrim na ka head-to-head, kam lah ban kyrmen ba kan kynjoh sha ka top 2 watlada ka jop ia ka Nongkseh ha ka jingiakhun la sngi Nyngkong bad ka SLFC ka shah rem ha ka Rangdajied.
Shuwa kane, u Banpynkhrawnam Nongkhlaw (30) ula ioh thep ia ka kol ba nyngkong jong ka lympung na ka bynta ka Nongkseh SSCC kaba hap ap ia ka kylla miet ban pyni ia ka jingbiang tam kum ka kynhun ha ka jingiakhun.
Hadien ka jingpulom ki katto katne ki lad thepkol, u Khrawkupar Jana (56,63) ula thep ia artylli ki kol tang hapoh ka 7 minit hadien ka kol u Sheen Sohkting kaba la wan ha ka minit ba 59.
Ka kol jong ka Rangdajied kala wan lyngba u Pasborlang Khonglokong ha ka minit ba 76.
Mynta ka taiew kan kut da ka jingialehkai ka Group B lashai ka sngi. Ha ka por 2 baje janmiet, ka Nangkiew Irat kan iakhun pyrshah ia ka Maram FC bad ha ka por 6 baje janmiet ka Langsning FC kan iakhun pyrshah ia ka Rymbai Shkenshynriah SC.
Ha ka jingiakhun first leg, ka Nangkiew Irat kala jop da 7- 1 kol ia ka Maram FC bad ka Langsning kala jop da 3-0 ia ka Shkenshynriah.
