Shillong, Nailar 14 : Ka Khasi Students Union (KSU) kan sdang ban iaid pynshai paidbah sa ha Shillong halor ki san tylli ki mat jingdawa kiba la seng kala aipor 15 sngi ia ka Sorkar Jylla ba kan pyntreikam ba kynthup ia ka jingdawa pyntreikam ia ka Inner Line Permit (ILP).
Kine ki jingpynshai paidbah kin long ha ka dur jong ki 8 tylli ki jingialang paidbah-kiba la buh ban long ha ka 17 bad 18 tarik Nailar.
Kat kum ka kyrwoh na u General Secretary samla Reuben Najiar, ha ka 17 tarik Nailar, ki jingialang paidbah kin long ha Mawlai Stand Bus, Last Stop Laban, Pohkseh bad Umlyngka, Upper Shillong katba ha ka 18 tarik Naila kan long ha Laitumkhrah Police Point, Karbom Mawprem, YMCA Mawkhar bad Iew Nongmensong.
Kine ki jingïalang kin sdang ha ka por 7 baje janmiet.
Ki 5 tylli ki mat jingdawa jong ka KSU ki long:
1. Ban pynduh pyndam noh ïa ka ‘Public Hearing’ kaba la long ha 31.07.2026 jong ka Shree Cement kaba la ïa suh buit lypa hapdeng ka Sorkar bad ka Shree Cement ban thombor ïa kino kino kiba pyrshah ban ailad ïa ka Shree Cement ban tih ïa ki mar hapoh khyndew. Ka jingdawa ka long ruh ban weng kam ïa u Deputy Commissioner bad Superintendent of Police bad ki heh pulit ka East Jaintia Hills District ha ryngkat ki nongtrei jong ka Meghalaya State Pollution Control Board (MSPCB) namar ki don kti ha ka jingleh tuh ban khanglad ïa ki paidbah ba pyrshah ban don bynta ha ka public hearing namar ba ki la shah thied ha ka Shree Cement. Shuh shuh la dawa ban don ka jing tohkit (departmental proceedings) pyrshah ïa kine.
2. Ban pyntreikam noh pura ïa ka MRSSA 2016 katba ym pat ïoh ïa ka ILP. Lah 10 snem ka Sorkar Jylla ka la shu thok shukor ïa ki paidbah halor ka MRSSA, 2016 bad ka Seng kan nym treh ban pynslem shuh ïa kane namar man ka sngi ki mynder ki ïoh rung sha ka jylla namar ym don kano kano ka aiñ ban tehlakam ïa ki bad khamtam mynta ba dang shah kyndang ki mynder ha West Bengal bad Assam, bun ngut ki wan phet rieh shane. Ka Seng ka dawa ba ki khyrdop talasi (Felicitation Centre) kiba dei ruh ki entry bad exit point ki dei ban ïeng ha 18 tylli ki jaka jong ka Khasi bad Jaiñtia Hills ba lah pynskhem naduh ka Sorkar barim ym tang ha Umling. Ki District Task Force ki dei ban treikam ha man la ki distrik ban buh jingkheiñ jong ki nongshong shnong bad kiwei kiwei ki kyndon jong ka MRSSA, 2016. Ka Seng ka mana ruh ban ym bit ban don ki online registration jong ki nongshong shnong bad ban pynshisha ki dei tang ki Dorbar Shnong.
3. Ban pyntreikam noh ïa ka amendment jong ka Migrant Workmen Act, 2020 khnang ba nym ailad ïa ki bar jylla ban shu rung katba mon sha jylla bad knieh ïa ka pliang ja bad ka hok ki trai muluk.
4. Ban pynbeit ïa ka jingthung kam thung jam ha NEIGRIHMS. Ka Sorkar jylla ha u snem 2025 ka wan tuklar hi bad pynsangeh ïa ka jingïakhih ka Seng bad ka kular ban shimkhia ban pynbeit ïa ki jingdawa ka Seng bad ka Sorkar Pdeng hynrei la tam 1 snem pat don eiei bad ki kylla ktien lut baroh. Ka jingdawa ka Seng ha NEIGRIHMS ka long halor ka 80:20 female to male ratio ha ki kam nurse, ka reservation ba biang namar ki Khasi/Jaintia bad Garo ki ioh tang 7.5% reservation, ba ka NEIGRIHMS kan pynlong hi ïa ki eksamin thungkam da lajong bad hapoh jylla namar shabar jylla ka don ka jingleh thok kumba lah lap bad kiwei kiwei.
5. Ban wanrah ïa ka thungkam thungjam kaba khuid. Kata kaba nyngkong ban weng noh ïa ka Personal Interview na ki post Grade B, C & D kum ba lah bthah na ka Sorkar Pdeng. Kaba ar, ban pyntreikam ïa ki jingkylla ha ka MPSC bad DSC kum ba la ai jingmut ka Seng bad ba lai, ban don noh ki aiñ/ Standard Operating Procedure (SOP) na bynta kiwei ki recruitment board namar ïa kaba mynta kine ki recruitment board ki thep kam pathar bad katba mon.
Ka Seng ka khot ka wer ïa baroh u paid khasi khara ban ïa snoh kti ha kine ki jingïalang paidbah ban ai ka jingkyrshan halor kine ki mat.
