Tura, Jymmang 23 : U Myntri Rangbah ka Jylla Conrad K Sangma ula shah pynkup burom ha ka All Garo Hills SSA School Teachers Association (AGHSSASTA-CB) ha ka sngi Saitjain kum ka jingithuh ia ka jingpyrshang ka Sorkar jong u ban pynkhlain ia ka kam puthi puthi bad shimkhia ban leh eiei ia ki jingeh jong ki nonghikai SSA hapoh ka Jylla.
Ia kane ka jingialang pynkup burom la pynlong ha madan ialehkai ka Matchakolgre LP School ha Tura bad la wan iashimbynta da ki nonghikai, ki Ophisar ka Tnad Pule Puthi, ki nongialam shnong bad ki riew paidbah na kylleng ka ri-lum Garo.
Ha kane ka jingialang, u Myntri Rangbah ula pynlait ia ka MBoSE E-Office Management System bad Accounting System, ka digital dashboard kaba thmu ban pynjanai ia ka rukom pyniaid iaka pisa pilain, ka jingtreikam kaba shai bad ka jingkit khlieh hapoh ka kam pule puthi.
Ula pynlait ruh ia ka Chief Minister’s Leadership in Education and Development (CM-LEAD) Fellowship, ka prokram ka Jylla kaba pynwandur ban wanrah ia ki samla kiba tbit haka kam pule puthi ban kyrshan ia ka jingwanrah ia ki buit treikam thymmai, ka synshar khadar bad jingpyntreikam ia ki prokram pule puthi ha baroh ki 12 tylli ki District ka Jylla.
Kat kum ka jingong ki heh Sorkar, kane ka prokram ai jingiarap kan pynkhlain ia ka jingmih na ki jingai jinghikai ha jan 8000 tylli ki skul Sorkar bad ki skul ba ai jingiarap ka Sorkar ha baroh kawei ka Jylla.
Ha kawei pat ka prokram ba kongsan, u Conrad ula pynlait ia 27 tylli ki kali kiba thmu ban pynkhlain ia ka jingpeitbniah ki Ophisar kiba don ha ki lyngkha treikam bad ka iaid ka ieng ha kylleng ki District.
Haba kren ha ka jingialang, u Myntri Rangbah ula ong ba ka pule dangle ka dang long kawei na ki mat treikam ba kongsan eh jong ka Sorkar bad ai jingithuh ia ka bynta bala shim da ki Nonghikai bad ki Ophisar ha kane ka kam.
“Bun sien, ka jingtrei shitom ki Ophisar bad ki Nonghikai ka dei ka bym ioh jingithuh bad bym ioh jingiaroh wat hapdeng ka jingkitkhlieh kaba khraw kaba ki kit” ula ong.
Haba kdew ia ka jingaiti u (L) PA Sangma sha ka pule puthi, u Myntri Rangbah ula ong ba ki jingpynkylla ha ka kam pule puthi ka dei kaba la btin lynti da ki nongrim jong ka jongshakri bad ka jingpule kaba bha.
U Myntri Rangbah ula ainam ruh ia ka jingpass bha jong ki Khynnah ia ka eksam SSLC sha ki prokram bapher bapher bala wanrah da ka Sorkar, kynthup ka CM IMPACT Guidebook, bad ban jur ia ka jingkongsan ban pule da ka jingsngewthuh ban ia kaba shu bam lyndet.
“Ka don ka jingiapher bak ly bak hapdeng ka jingpule ban shu tip ia ka jubab bad ka jingsngewthuh ia kaei ka jingmut” ula ong haba kyntu ia ki nonghikai ba kin pynleit jingmut ha kaban pynbha ia ka jingmih na kaei kaba ki hikai hapdeng ki khynnah skul.
U Commissioner and Secretary ka Tnad Education Vijay Kumar Mantri ula kren halor ki jingpyrshang ba dang iaid jong ka Sorkar ban pynjanai ia ka synshar khadar, ka jingtreikam kaba shai bad ka jingpyndonkam ia ki technology ha ka kam pule dangle.
Ha kajuh ka por, u President ka AGHSSASTA-CB Labingstone G Momin ula ai khublei ia ka Sorkar halor ka jingpynbeit ia ki jingeh kiba la slem bha jong ki nonghikai SSA bad ka jingkynshew ha ka kam pule dangle.
