Shillong, Nailar 14: Ka Meghalaya kala buh ha ka kyrdan ia ka jingthain jain tynrai bad ia ka Eri Silk Sector kum ka lad kamai bad ka lad ban pynneh pynsah ia ka kolshor tynrai jong ka jylla, ha kaba u Myntri Rangbah ka Jylla u Conrad K. Sangma ha ka sngi Thohdieng ula pynpaw ia kiba bun ki sienjam kiba ka sorkar kala shim halor ki jingtei kiba iadei bad ka kam thain jain, jingioh jingithuh GI, ki iew ki hat, jingdonsap bad ka jingai jingkyrshan pisa ia ki nongthain jain.
No better way to celebrate #NationalHandloomDay and the culmination of #NationalHandloomWeek than being with our weavers, spinners and rearers at the Integrated Textile Tourism Complex at Ri Sai, Nongpoh.
Glad to inaugurate the Centre of Excellence, which will help preserve and… pic.twitter.com/uz94tWC5T4
— Conrad K Sangma (@SangmaConrad) August 14, 2026
Haba kren ha ka prokram jongka National Handloom Day kaba long ruh ka jingrakhe ia ka 12th National Handloom Week ha Integrated Textile Tourism Complex ha Ri Sai, Nongpoh, u Sangma ula ong, ba ka rukom shimkhia ka sorkar kala liaid palat ia ka lad ban kamai jakpoh sha ka jingiada ia ka kolshor kaba rim naduh hyndai hynthai jong ka Meghalaya.
“Ki Design kiba la pyninam – Dakmanda, Dharashat, Mukhli bad Thoseru kim dei satia tang ki jain ne ka riam hynrei ki mihkhmat ia ka jinglong tynrai jong ki jaidbynriew bapher jong ka jylla” ula ong.
“Ia ka sorkar, ban kyrshan ia ki nongthain jain kam dei satia tang ka lad ban kamai jakpoh hynrei ka jingkynshew tyngka ha ka kolshor bad ka jinglong tynrai. Kane kadei ka jingrakhe ka Meghalaya bad ka kyrwoh sha ka ri bad ka pyrthei ba ngi long kiba sngewsarong ia ka jingdon jingem kiba naduh hyndai hynthai” la ong u Sangma.
Ula ong, ha kine ki 6-7 snem kiba la dep, ka sorkar kala trei ban buh ia ka jinglong tynrai, kolshor, ka ktien bad ka riti dustur kum ki mat kiba kongsan jong ka jingiaid shakhmat jong ka jylla.
U Sangma ula pynpaw ruh ba ka Khasi bad Garo kila ioh ia ka kyrdan Official Languages hadien 54 snem bad ka ong, ba ka rai kadei da ka jingthmu ban iada ia ka jinglong kongsan bad jinglong tynrai jong ki paitbah.
“Ka jingiaid lynti ka jong ngi kala iaid palat ia ki jain bad ka jingthain. Ngi dang thain ia la ka jong ka kolshor. Ngi dang iada ia ka. Kane kadei kata kaba ngi lah kynshew ha ki briew ki jong ngi” ula ong.
U Myntri Rangbah ula ong, ba ka kam thain jingthain ha Meghalaya kadei kaba la kyntiew ha kata ka dur da ka jingpyniasoh lang ia ki jingtei, jingpynwandur (design), kam jngohkai, ki lad ha ki iew ki hat bad ka jingkyrshan ia ki nongpynmih.
Ula ai ka jingiaroh ia ka St Anthony’s College kaba la ai jinghikai ban thain jain ban pyndonkam ia ka Instagram ban kyntiew ia kine ki mar, ban iarap ia ki ban lah ban pyniaid bha ha kylleng ki iew kiba iar.
Ha ka sngi Thohdieng u Conrad Sangma ula plie ia ka Centre of Excellence, kaban iarap ban pynneh pynsah bad ban sam ia ka sap bad ia ka riti dustur jong ka jingthain ia ki jain ryndia ne Eri sha ki pateng ban dang wan.
Kane ka Integrated Textile Tourism Complex ha Ri Sai ka kynthup ia ka Ahimsa Silk Training bad Design Centre, Restaurant, Cottage bad Retail Plaza, da kaba wanrah lang ia ki jingshna, jingbam, kolshor, khaii pateng bad ka kam jngohkai hapoh jong kawei ka rynsan.
U Sangma ula ong, ba u dap da ka jingkmen ban iohi ba ka Umden-Diwon bad ka Ri Bhoi kila kylla long kum ki jakapdeng jong ka kam thain jain tynrai bad ki nuksa ba im jong ka Meghalaya ha ka jingdon jingem ia kiei kiei kiba naduh hyndai hynthai.
Ula sam ruh ia ki khusnam sha ki nongseng kam thain jain, nongthain jain bad nongrep kum ka jingithuh ia ka jingpyrshang kaba radbah ha kaban kyntiew ia ka jain ryndai bad ki mar kiba la pynmih.
Ha kane ka prokram u Myntri Rangbah ula pynher ruh ia ka lama ka ri kum shi bynta jong ka Har Ghar Tiranga.
Palat 50,000 tylli ki longiing ki Shaniah ha ka kam thain jain
Ka tnad kam thain jain ia mynta ka kyrshan ia ka kamai kajih ia palat 50,000 tylli ki longiing ha kylleng ka Meghalaya, ha kaba palat 70% na ki nongtrei kidei ki kynthei.
Tang ha Ri Bhoi, kumba 4,000 ngut ki nongthain jain kiba lah dep ban rejistar bad 3,200 ngut ki nongrep ban pynmih ksai, jan kumba 90% kidei ki kynthei bad longkmie.
U Sangma ula iawer ia ki paitbah ban bteng ban rakhe, iada bad kyntiew ia ka jingriewspah ka Meghalaya ha ka riti dustur jong ka kam thain jain. Ula ong ba ka National Handloom Week ka plie lad ban burom ia ki nongthain jain, nongsuh jain bad ki nongpynmih ia ki ksai, ha ryngkat bad ka ai jingithuh ia ka jingnoh synniang ka jongki lyngba ka jingai khusnam.
Na ka Eri Silk Village sha ka karkhana bala ioh Geographical Indication (GI)
Ka Sorkar kala shim ia ki lad ban kyntiew ia katei ka bynta bad kala iar ha kine ki 5 snem kiba la dep.
Ha u 2021, ia ka Umden-Diwon la pynbna kum ka Eri Silk Village kaba nyngkong eh ha ka jylla, kaba la wanrah ia ka jingkylla haba ka Meghalaya kala sdang ban ai jingithuh ia ka kam thain jain.
Ha u 2022, ka sorkar kala seng ia ka Design Innovation Resource Centre, kaba la plie lad ia baroh ka rukom kaba iadei bad ka jingpynmih ia ka Ryndia — na u niangryndia sha ka jain kaba la dep thain ban ioh sakhi thik tang ha kawei ka jaka da ki nongwad bniah.
Ha u 2024–25, la ioh iaka jingithuh na ka Geographical Indication (GI) ia ka Ryndia bad Khasi Handlooms, ha ryngkat ka jingthaw ia ka Meghalaya Ryndia Producers Organisation ban bat bad khmih ia ka GI.
Ka Meghalaya Ryndia Producers Organisation mynta ka bat ia ka GI na ka bynta ki nongthain kiba la thaw ia kane ka jinglong kordor.
Ha u 2026, la plie ia ka Integrated Textile Tourism Complex ha Ri Sai, da kaba wanrah lang ia ka kam thain jingthain, ki jingbam, kolshor, khaii pateng bad kam jngohkai ha kawei ka rynsan.
Nang kiew ka jingkyrshan ia ki nongthain jain
Hapoh ka Income Generation Programme, ka Tnad kala sam ia ki tiar ki tar bad ia ki ksai sha ki 2,141 ngut ki nongthain jain ha u 2024–25 bad 2,448 ngut ki nongthain jain ha u snem 2025–26 kaba long ka jingkiew ia ka jingdon sa 307 ngut ki nongthain jain tang ha uwei u snem.
Hapoh jong ka Cluster Development Programme jongka National Handloom Development Programme, ka projek kaba T.571.15 Lak kadei kaba dang iaid ha ka jingpyndonkam ia ka, ha kaba T.260.35 Lak kadei kaba lah dep ban pyllait ha ka wat kaba nyngkong ne First Instalment.
Ka projek ka don ia ka thong ban ai jingmyntoi ia ki 981 ngut bad ka kynthup ia ka kyndon na ka bynta ki 300 tylli ki kor thain jain bad ka jingai jingkyrshan ia ki jaka treikam kaba long T.1.20 Lak mar kawei.
Naduh u snem 2022–23, ka Meghalaya kala ioh pdiang T.2,198.24 lak hapoh jongka Silk Samagra-2 na ka Central Silk Board, kynthup ia ka T. 201.61 Lak ha une u snem ba mynta.
U Myntri Rangbah ula ong, ba ka jingthmu jong ka sorkar ka long ban pynkhlain ia ka kam thain jain khlem da pyniakhlad ia ka jingroi ha ka ioh ka kot bad ka kolshor jinglong tynrai ka Jylla Meghalaya.
Ha kane ka jingialang la iadonlang u Myntri Sorkar u Bah Metbah Lyndoh, u MLA Bah Mayralborn Syiem, ka MDC ka Kong Rona Khymdeit, u Chief Secretary u Dr Shakil Ahammad bad kiwei kiwei kiba donbynta lang ha ka kam thain jain.
