Shillong, Jymmang 19 : Ka Iingkashari Meghalaya High Court kala pynkynriah ia ka jingbishar ia ka mudui kam bymman bala ujor da ka Sorkar pyrshah ia ka Sonam Raghuvanshi, ka nongshah kynnoh ba hakhmat eh ha ka jingpyniap iala u kurim, u Raja Raghuvanshi ha Sohra, sha ka 20 tarik Jymmang.
Ka Iingkashari u Justice W Diengdoh kala buh ia kane ka mukotduma hadien ba u Advacate General A Kumar, bala iarap da u Special Public Prosecutor N Khera, kila pan por na ka bynta ka Sorkar.
“Halor ka jingkyrpad da u A Kumar, AG bala synran da u N Khera, Special PP na ka bynta ki nongmudui ka Jylla, buh ia kane ka kam ban bishar ha ka 20.05.2026” ong ka Iingkashari ha ka hukum ha ka mukotduma Crl.Petn. No.47 of 2026.
Ha u bnai bala lah, ka Iingkashari Magistrate kala ai jamin ia ka Sonam, hadien ka jingai rai ba ki Pulit kim shym la lah bha ban pynshai ia ki nongrim ka jingkem ia ka.
Ha ka hukum ba pynmih ha ka 27 tarik Iaiong, haba pynwai ia ka aplikeshon pan jamin, ka Iingkashaei Additional DC (Judicial) DR Kharbteng, ka ong ba ka don ka jingbakla ha ka rukom pynwan ia ki jingkynnoh kila pynkhein ia ka jingiada ka riti synshar hapoh ka Artcile 22(1) bad pynduh ia ka lad ban iada ialade ka nongshah kynnoh.
Katba ia ka ejahar la register ha ka Sohra PS Case No 7/2025 hapoh ka kyndon 103(1)/238(a)/309(6)/3(6) jong ka BNS, ka jingpyntip ia ki nongrim ka jingkem bala ai sha ka Sonam ka kdew ia ka kyndon 403 (1) ha ka jaka ka 103 (1).
“Haba khmih ia ka Annexure 8… Ha kata ka format ba la ai sha ki nongshah kynnoh, ym shym la ha kano kano ka check box ban pyni ïa ki jingkynnoh pyrshah ïa ka nongshahkynnoh,” ka rai ka la ong.
