Shillong, Jymmang 19 : Ka Iingkashari Meghalaya High Court kala pynksan ia ka hukum pynrem ia u Rishan Marwein namar ka jingleh beijot iala ka jong ka hep kynsi ba dang khynnah, haba kyntait ia ka jingkyrpad pyrshah ia ka hukum set phatok ba 20 snem bala pynmih da ka Iingkashari POCSO ha Nongstoin.
Ka Iingkashari ba kynthup ia ka Chief Justice Revati Mohite Dere bad Justice W Diengdoh, ha ka hukum ba pynmih ha ka 18 tarik Jymmang, ka ong ba ka kam kam dawa ia ka jingtuklar halor ka hukum ba 22 tarik Nailur, 2023 bala pynmih da ka Special Judge (POCSO) West Khasi Hills, kaba shem ba u Marwein ula leh ia ka kam bymman kaba hap hapoh ka kyndon 6 jong ka POCSO Act, 2012.
Ka Iingkashari kala hukum ban set phatok ia u haduh 20 snem bad ka kuna ba T.30,000, nalor lai bnai lada um lah siew ia ka kuna.
Ka Iingkashari POCSO kala ai jingmut ruh ban siew bai lutksan ba T. 1 lak sha ka lanot lyngba ka Meghalaya State Legal Services Authority.
Kane ka mukotduma ka don jingiadei bad artylli ki jingjia ha u bnai Risaw 2020.
Ka hukum ka ong ba u Marwein, uba iashongkha bad ka hynmen kane ka khynnah bad don arngut ki Khun, ula leit shaw ia kane ka khynnah ba 16 nem na skul ha ka 12 tarik Risaw, 2020 bad ialam bam ia ka ha Aroma Restaurant ha Nongstoin bad leh khlem akor ia ka ha painkhana. Ula leh khlem akor biang ia ka ha ka 17 tarik Risaw, 2020 hala ka jong ka IIng ha ka por ba ka kurim kam don satia.
Kane ka khynnah kala pyntip ia kine ki jingjia sha ki Kmie Kpa ha ka 18 tarik Risaw, 2020, ha kaba ka Hynmen, kala ujor ia ka ejahar ha Nongstoin Police Station ha ka 20 tarik Risaw, 2020.
Ha ka por ba iaid ka jingbishar, ka khynnah, kala phla ba hadien ba dep bam ha Restaurant, u Marwein ula bat ia ka na kti bad patan sah painkhana, doh ia ka, pynlaw jain ia ka, law jain ialade bad leh beijot ia ka”.
Ka iathuh ba ka jingjia kaba ar kala jia ha ka Iing ka hynmen haba ka leit ban kren ia u ba kam ktah shuh ban bteng kane ka jingiadei marmet. Ka iathuh ba u Marwein ula shim ia ka blade bad byrngem ban ot ialade haban da iap, lada ka ieh ia u. “Ka sngi kha jong ka, kat kum ka syrnot sngi kha bala ai da u Kpa jong k aka long 16.03.2004.
U Nongiasaid Ain HS Shangreiso, uba mihkhmat ia u Marwein, ula iasaid ba ka jingiadei jong ki ka dei kaba iamon lang bad shaniah ha ki artylli ki hukum ka Iingkashari ban pynksam ba kam dei ka kam leh beijot.
U nongiasaid ain ka Sorkar R Gurung ula kynthoh pyrshah da kaba ong ka jingmynjur lang kam shongnia satia naba kane ka khynnah ka dei kaba dang 16 snem bad ong ba u Marwei ula pyndonkam bakla ia ka jingiadei” bad la ka hep kynsi.
Ka Iingkashari kala pynksan ba hapoh ka POCSO Act, ka jingmynjur bala ai da ka khynnah ba hapoh ka 18 snem ka dei ka bym shong nongrim bad iahap bad shem ba ki hukum ba la kdew da u nongkyrpad, ka dei kaba lah ban pyniapher shai”.
Ka Iingkashari kala hukum ia u Secretary ka District Legal Service Authority ka West Khasi Hills, ba un ai ia ka kaiphod hapoh ka hynriew taiew la lah ai ne em ia ka bai lutksan ba T.1 lak sha kane ka khynnah.
Ia kane ka mukotduma la buh ban bishar biang ha ka 18 tarik Jylliew, 2026.
