Guwahati, Jymmang 13: U Myntri Rangbah ka jylla Manipur, u Y. Khemchand Singh, ha ka sngi thohdieng, u la pynrem jur ïa ka jingshah pyniap jong ki lai ngut ki riew paidbah ba lui lui, kynthup ïa ki nongïalam balang, ha ka ambush hapdeng ki thaiñ Kotlen bad Kotzim jong ka distrik Kangpokpi, da kaba batai ïa kane kum ka “dastardly terror act” kaba thmu ban pynthut ïa ka jingsuk hapoh ka jylla.
Ha ka jingkynthoh, u myntri rangbah u la ong ba ki nongleh kam sniew kiba don tiar ki la siat naphang ia ka kynhun ki riew paidbah, ha kaba lai ngut ki la iap bad saw ngut ki la mynsaw.U la iathuh ruh ba lai ngut na kitei kiba mynsaw la rah noh sha Shija Hospitals bad Research Institute ha Imphal ban ioh ia ka jingsumar bad u la pynthikna ba ka sorkar jylla kan bei lut ia baroh ki jinglut jingsep ha ka jingsumar.
“Kane ka jingleh donbor ka long kaba pynsngewsih bad pynjot pynpra ym tang ïa ki longïing hynrei ïa ka jylla baroh kawei, namar ka pynthut ïa ka lynti jong ngi sha ka jingsuk,” u la ong bad bynrap ba ki kam lehnoh bad ki kam thombor khlem jingmut kiba thmu ïa ki riew paidbah ki ba lui kim don jaka “ha ka imlang sahlang kaba la nang la stad.”
U myntri rangbah u la kyrpad ïa baroh ki bynta jong ka imlang sahlang ban pynneh pynsah ïa ka jingsuk bad ka jingpynïaid beit bad u la kyntu ïa ki briew ban sangeh noh mardor ïa ki “jingrahbor, bad jingpyntieng ha ka imlang sahlang,” da kaba maham ba kum kine ki kam ki lah ban pynsniew shuh shuh ïa ka jinglong jingman.
U la pynthikna ruh ba ka sorkar jylla kan pyndonkam ïa ki lad ki lynti baroh ban pynngat ïa ki nongleh kam sniew bad ban pynioh ia ka hok.
U Lat ka Jylla Manipur, U Ajay Kumar Bhalla, ula pynrem ruh ia katei ka jingjia, da kaba pynpaw ia ka jingsngewkhia halor ka jingduh noh ia ki mynsiem briew kiba lui lui, kynthup ruh ia ki nongialam balang, kiba la iathuh ba ki iadon bynta ha ki kam ban wanrah ka jingiasuk iasain.
U Lat u la phah ïa ka khubor sngewlem sha ki bahaïing hasem kiba la duh noh, u la duwai ba kiba mynsaw kin koit noh kloi bad u la kyrpad ïa baroh ki jaitbynriew ban pynneh ïa ka jingsuk, ban pynïaid beit, bad ban ïatreilang ban pynphai biang ïa ka jingïasuk bad ka jinglong jingman ha ka jylla.
Katei ka jinghiar thma ne ka ambush, ka la shim ïa ka jingim jong ki nongïalam balang, kynthup ïa u Rev. Dr Vumthang Silthou, general secretary barim jong ka Manipur Baptist Convention (MBC), uba la ïathuh ba u la don bynta ha ki kam ban tei ïa ka jingsuk ha kane ka Jylla ba la shah ktah ha ka jingïakynad bad ia umsnam.
Ka United Naga Council (UNC), ka Nagaland Joint Christian Forum (NJCF) bad ki seng Kuki ruh ki la pynrem jur ia kitei ki jingshah pyniap ha kaba ki la ong ba katei ka jingshah thombor ka long kaba shyrkhei bad kaba pynpait dohnud.
Ha ka kyrwoh, ka NJCF ka la ong ba ki lanot ki la “trei shitom na ka bynta ka jingsuk bad jingïasuk ha Manipur kaba la shah pynjot na ka jingïaumsnam.”
“Ka jingaiti jong ki ka long ka jingpynkynmaw kaba sngewsih ba ka jingleh donbor ka ba ym tang ïa ki jingim hynrei wat ïa ka jingkyrmen jong ki jaitbynriew kiba kwah eh ban ïoh jingkoit jingkhiah,” ong ka forum, katba ka kyntu ïa ki Kuki, ki Naga bad baroh ki jaitbynriew ban kyntait ïa ka jingleh donbor bad ban wanrah biang ïa ka jingsuk.
Da kaba shim ia ki dkhot jong ka Bible, ka kynhun Khristan ka la ong, “Suk kiba pynlong jingsuk, naba yn khot ia ki ki khun U Blei,” bad duwai ban ioh jingpyntngen bad jingpynkhlain ia ki longiing kiba la duh noh.
Ha kajuh ka por, ka UNC ka la pynpaw ïa ka jingsngewkhia halor ka jingkynnoh ba ki don ki jingleh pyrshah hadien ka jingshah thombor, da kaba kynnoh ba ym duna ïa ka 20 ngut ki Naga na ka shnong Konsakhul ki la shah rahbor ha ki nongshong shnong jong ka shnong Leilon Kuki tang katto katne kynta hadien ka jingshah thombor.
Ka council ka la ong ba ka jingthmu ïa ki nongshong shnong ki ba lui lui bad ka jingbat ïa ki kum ki nongshah teh mraw ka pynkheiñ ïa “baroh ki kyndon jong ka imlang sahlang kaba la nang la stad” bad ka la dawa ban pyllait noh ïa ki mardor bad khlem kano kano ka jingdawa.
Ka Kuki Inpi Manipur ka la kynnoh ba ïa kane ka jinghiar thma la pynlong da ka kynhun ZUF-Kamson bad ki volunteer jong ka shnong, da kaba batai ïa kane kum ka jinghiar thma kaba “khawpud bad riewkhlaw” kaba thmu ïa ki nongïalam Balang bad ki riew paidbah ki bym don tiar.
Ka seng ka la ong ba dang shen u Rev. Silthou u la ïashim bynta ha ki kam ban wanrah ia ka jingïasuk ha ryngkat ka Nagaland Joint Christian Forum ha Kohima kaba thmu ban wanrah ïa ka jingïasuk hapdeng ki jaidbynriew Kuki-Zo bad ki jaidbynriew Tangkhul.
U Myntri Rangbah ka Nagaland, u Neiphiu Rio, u la pynrem ruh ïa ki jingpynïap briew, da kaba khot ïa ki kum ki “jingleh riew khlaw pyrshah ïa ki jingim kiba lui lui” kiba “ym don jaka ha kano kano ka imlang sahlang kaba la nang la stad.”
Ka Kuki Students’ Organisation Delhi & NCR ka la pynbna da ka jingthang mombiti bad ka jinglehniam tep kum ka jingkynmaw burom ia ki nongialam balang kiba la shah pyniap katba ki dang dawa ia ka hok bad ka jingkitkhlieh.
Kine ki jingshah pyniap ki la pynmih ïa ka jingsngewkhia kaba jur ha kylleng ka thaiñ shatei lammihngi hapdeng ka jingtieng ba kan mih biang ka jingïakynad ha ki jaka lum jong ka Manipur.
