Shillong, Jymmang 13 : U Myntri Rangbah ka Jylla Conrad K. Sangma, ha ka sngi Balang, u la pynlong ïa ka durbar paidbah hapoh ka kamra treikam jong u bad ïakynduh ia ki briew na ki bynta bapher bapher jong ka imlang sahlang kiba la ïalum ban pynpaw ïala ki jong ki jingsngewkhia, ki jingeh, bad ki jingkyrpad jong ki na ka Sorkar.
Ha ka jingïakren, u Myntri Rangbah u la sngap ïa ki mat ba la pynsngew da ki nongshong shnong kiba ïadei bad ki bynta bapher bapher, kynthup ïa ka bha ka miat jong ki paidbah, ka roi ka par jong ki shnong, ki jingtei, ka kamai kajih, ka pule puthi, ka koit ka khiah, bad kiwei pat ki jingeh hala ki jong ki jong ki shnong ki thaw.
La ailad ruh ïa ki riew shimet, ki nongmihkhmat jong ki shnong, bad ki kynhun kiba wan na ki bynta bapher bapher jong ka jylla ban iathuh markhmat ïa ki jingdonkam bad ki jingai jingmut jong ki.
U Myntri Rangbah u la ai jingkular ïa kito kiba la iashimbynta ha ka durbar ba ka sorkar ka dang ïai bteng ban long kaba shah shkor ïa ki jingeh jong ki nongshong shnong bad ban pyntikna ba ïa ki jingeh jong ki nongshongshnong yn sa pynbeit hapoh ka pork aba biang bad ka rukom treikam kaba janai.
U la bthah ruh ïa ki heh Ophisar ba kin bishar ia kine ki mat bala wanrah hakhmat bad ban shim ia ki sienjam kiba donkam ban leh haba dawa ka kam.
Ka durbar paidbah ka long kum ka rynsan kaba donkam na ka bynta ka jingïakren markhmat hapdeng ka sorkar bad ki paidbah, kaba pyni ïa ka jingpynleit jingmut ba khlem sangeh jong ka sorkar ban iakynduh ia ki paidbah, ban wanrah ia ka jingtreikam kaba shai bad ka jingsynshar kabab buh hakhmat eh ia ki nongshong shnong.
