Shillong, Jymmang 11 : Ka Sorkar Meghalaya kala pynkhreh ia ka detailed project report jong ki project ba kot haduh T.800 klur na ka Urban Challenge Fund Scheme ba thymmai ka Sorkar Pdeng, kaba pynleit jingmut ha ki kam shna pynbha ia ki nala, ka jingpynitynnad ia ka sor bad ki jingtei ba kongsan jong ki jaka sor.
Ia kane la pyntip da u Symbud Myntri Rangbah ba khmih ia ki kam Pynroi Sor Bah Sniawbhalang Dhar haba iathuh ba dang shen u Myntri ka Sorkar Pdeng ba khmih ia ki kam Pynroi Sor ula lum ia ka jingialang ban iakren ia kane ka skhim ha New Delhi.
“Ka dei ka jingialang kaba kongsan bha kaba iadei bad kane ka skhim thymmai bala pynlait da ka Sorkar India bala ai kyrteng ka Urban Challenge Fund Scheme” ong u Bah Sniawbha.
“Nga kmen ban pyntip sha phi ba ngi la ioh ia ka song tyngka ba bun bha kaba kot da ki spah klur na kane ka skhim. Ngin sa pynkhreh mynta ban shna ia ka detailed project report kaba ym duna ia ka T.800 klur” ula bynrap.
Haba buh thup ia ki kam kiba kongsan, u Bah Sniawbha ula ong “Ki don katto katne ki project na ka bynta ban pynroi ia ki jaka sor, khamtam eh ki jingtei. Ngi la tyrwa ban trei pynbha ia ki jingtei ba donkam jong ki jaka sor bad ka jingpynitynnad ia ka sor”.
“Hapoh ki kyndon treikam, ngi lah ban aiti ia ki skhim ba iadei bad ka jingshna pynbha ia ki nala bad kiwei ki jingtei kiba donkam jong ka sor” ula ong.
U Bah Sniawbha u pyntip ruh “Ka Integrated Command and Control Centre na ka bynta ka jingshngain ka sor baroh kawei, ka don halor eh na ki thup bala kyrpad, hynrei ngi la dep don ia kawei, bad kumta kane kam don shuh ha ka jingiapyrkhat. Ka jingpynleit jingmut ka long eh ha ka jingshna ia ki nala bad pynbiang ia ki jingdonkam ka sor. Ka jingthmu hi ka long beit thik tang ia ka jingpynroi ia ki sor”.
Halor ka jingdawa ki sengbhalang ban buh ia ka Cultural Centre ha Khyndailad, u Bah Sniawbha ula ong ba ka Sorkar kan iaid kat kum ka jingkwah u paidbah. “Balei ba ki Sengbhalang kin hap ban dawa? Ngi hap ban trei kat kum ka mon jong u paidbah” ula ong.
“Ka Sorkar ka shai bha ; ngi leh beit ia ki kam halor ka jingkyrpad jong ki aidbah ka Jylla. Kane ka dei ka nongrim treikam jong ngi” ula ong bad bynrap “Hateng hateng ngi shim ia ki rai, bad hateng hateng ngi weng noh ia ki na ka bynta ka bha ka miat u paidbah”.
U iathuh ba na ka bynta ka Khyndailad, ka Tnad kala dep pynkhreh ia ka DPR ban pyntreikam ia ki project ba pynitynnad ia ka jaka.
