Shillong, Jymmang 11 : U National Vice President ka NPP bad Symbud Myntri Rangbah ka Jylla Bah Sniawbhalang Dhar ula ong ba kam pat don satia kano kano ka “jingaiktien” ne ka “jingpyni dak” haba iadei bad ka khubor ba mut wan iasoh NPP u Nongialam ka TMC Mukul Sangma.
Kat kum ka jingong jong u, ka party kam pat iohktien eiei halor ka khubor ba thmu wan iasoh u Mukul Sangma haba pyntip pat ba ka NPP hi ka long kaba pdiang sngewbha beit ia ki briew kiba wan rung thymmai.
“Ia mynta, kam pat don kanp kano ka jingaiktien sha nga bad nga hi dalade ngam pat tip. Kat haduh mynta kam pat don satia kano kano ka dak” ong u bah Sniawbha haba kylli halor ki khubor antad kiba la saphriang.
Ula pynshai ba kam pat don satia kano kano ka jingiakren halor kane ka kam. “Kam pat don ka jingiakren halor kane bad ki Nongialam ka TMC” ula ong.
Halor ka jingkdew ba kane ka khubor antad kala mih hadien ka jingiatreilang ka NPP bad ka TMC ha GHADC, u Bah Sniawbha ula ong ba ka jingiatreilang ha ka kam sain pyrthei kam mut sha ka jingiasoh.
“Ki don ki khep ba ki seng sain pyrthei kila wan iatreilang naka bynta ka jingbha jong ka Jylla. Kane ka ju jia hakano kano ka ishu” ula ong “hynrei kam mut pat ba lada ngi iatreilang bad ka NPP ha Garo Hills, kin sa wan iasoh noh bad ka NPP”.
“Na ka bynta ka bha ka miat ki paidbah ka Jylla, teng teng ngi kum ki riewsain pyrthei bad nongthaw ain, ngi hap ban iatreilang” bynrap u Bah Sniawbha.
