Shillong, Jymmang 08 : U Symbud Myntri Rangbah ba khmih ia ka Tnad Urban Affairs Bah Sniawbhalang Dhar ha ka sngi Thohdieng, ula iathuh ba ka Sorkar ka dang trei ia ki kam halor ka jingpynkynriah noh ia ki dukan madan na Laitumkhrah, kaba la ioh ia ka jingiatreilang bad u Rangbah Shnong bad lah dep ruh ban ithuh ia ki jaka ban pynkynriah.
“Ngi la trei ia ka kam. Wat ha u bnai bala lah, Nga la iashong jingialang bad baroh ki Rangbah Shnong ka Laitumkhrah bad kila kmen bha ba khot ia ka jingialang, hynrei ngin dang ban leh ia ki kam ba thmu ban leh” ong u Bah Sniawbha.
Ula ong ba ka jingslem baroh ka dei namar ka jingmih ki jingeh bad ki Dorbar Shnong.
“Balei ba kala slem khyndiat- namar ki don katto katne ki jingeh ba iatakhuh bad ki Dorbar Shnong bad mynta ngi la lah ban iarai lang bad mynjur. Ngi la dep ruh ban ithuh ia katto katne ki jaka bad ngin sa pynkynriah ia ki ha ka por kaba biang” ula ong.
Halor ka jingtyrwa shna jaka iaid kjat u paidbah ha Khyndailad, u bah Sniawbha ula ong ba ka jingpynkhreh ia ka detailed project report ka dang iaid mynta.
Haba kynthoh halor ki khubor ba julor biang ka tnum jong ka Iingdorbar ba thymmai ha New Shillong, ula ong “Wat khuslai, yn sa leh paka bha ia kiei kiei baroh. Mynta ka dang don hapdeng ka jingtei. Kumno kan don ka jingjulor haba ia ka kam ym pat lah pyndep. Ta ka daw ngin ap haduh ban da dep pura ia ka”.
Halor ka jinglong jingman ka Inter-State Bus Terminal, u bah Sniawbha ula ong ba la dep ai ia ki jingbthah sha ka Meghalaya Transport Corporation ba kin pynkhuid.
