Shillong, Jymmang 05 : Ka Kynhun Myntri ka Sorkar Jylla ha ka sngi Ba-ar, kala ai jingmynjur ban thungkam pura noh ia ki 98 ngut ki nongtrei Adhoc kiba la thung hashuwa ka 31 tarik Nohprah 2007.
“Ka kynhun Myntri ka Jylla kala mynjur ban thungkam pura ia ki nongtrei adhoc kiba la thungkam hashuwa ka 31 tarik Nohprah 2007. Kane ka dei ka batch kabab lai” ong u Myntri Sorkar bad Nongaiktien ka MDA Bah Wailadmiki Shylla haba iakren bad ki nongthoh khubor hadien ka jingialang.
U iathuh ba ki don 98 ngut ki nongtrei kiba dei na ki tnad bapher bapher bad ka Tnad ka Koit ka Khiah ka dei kaba don bun eh.
“Mynta ka kynti, u nombor bala wan sha ngi ban thungkam pura u dei 98. Ki dei na ki tnad bapher bapher bad kham bun ki dei na ka tnad ka Koit Khiah. Ki don 55 ngut tang na ka tnad ka Koit ka Khiah” ula ong.
Halor ka jingktah ia ka pla tyngka na kane ka rai, u Bah Wailad ula pynshai ba kan nym don eiei ne don jingktah. Kine ki nongtrei ki dei kiba la shakri lypa ha ki kam bym pat mang bad kila sei ia ka tulop jong kiba trei regular.
“Phi dei ban sngewthuh ba kila trei lypa ha ki kam kiba la nang, kumta kila sei lypa ia ka scale pay kum ki nongtrei Sorkar hynrei ka shu long ba ka jingthungkam ha katei ka por ka long da ka adhoc” ula ong.
“”Kumta, kan ym don satia kano kano ka jingktah ia ka pla tyngka namar ngi shu pynskhem ia ka jingshakri jong ki” ula bynrap
