Shillong, Risaw 19 : Ka Nongkseh SSCC ka la khur ïa ka nam lahduh jong ka SSA Super Cup bala pynlong ha ka sien ka ba-ar, hadien ba ka la pyni ïa ka jingïalehkai kaba itynnad ha ka jingïakhun phainal pyrshah ïa ka Meghalaya Police bad jop da 3-0 kol ha SSA Stadium, Shillong, hynne ka janmiet sngi Nyngkong.
Ka Nongkseh ka la ïoh ïa ka kol kaba nyngkong ha ka minit kaba 8 lyngba ka kol ba la thep bakla hi da u rangïalehkai ka Meghalaya Police, u Wanteilang Kharkongor. Hadien kata, u Dawanchwa Challam u la thep ïa ka kol kaba ar ha ka minit kaba 78, katba u kapten ka kynhun, u Hardy Cliff Nongbri, u la pyndep ïa ka jingjop da kaba thep ïa ka kol kaba lai ha ka minit kaba 86.
Hakhmat jong ki paidbah nongpeitkai kiba la pyndap ïa ka SSA Stadium, ka jingïakhun kaba shitrhem ha ka kylla step ka la pynmih ïa ka kol kaba nyngkong ha ki minit ba dang sdang.
U Chesterpaul Lyngdoh u la pyrshang ban phah ïa ka bol shapoh ka box na ka bynta u paralok jong u, u Kitboklang Pale, hynrei ka bol ka la leit syllud ïa u Wanteilang Kharkongor jong ka Meghalaya Police bad rung beit shapoh ka kol.
Ha ki minit ba sdang, ka Nongkseh ka la pyni kumba don jingkhuslai ha ka jingïada, katba ka kynhun ki pulit ka la ïakhun tyngeh ban wanphai biang sha ka jingïakhun.
U Chesterfield Nongdhar u la pyrshang ban shut ïa ka bol na jngai ha ka minit kaba 19, hynrei ka bol ka la dei ia ka dieng kol.
U Bisharlang Kharumnuid u la long uwei na ki rangïalehkai ba trei shitom tam na ka bynta ka Meghalaya Police bad ha ka minit kaba 36, u la ioh bsuh lynti na ki rangïalehkai samla jong ka Nongkseh bad phah ïa ka bol kaba biang sha ka box hynrei u Aldrin Ramsiej, watla u la ïoh ïa ka kabu kaba biang bha, u la shut ïa ka bol shaba jong ka kol.
Ha kaba sdang jong ka kylla miet, ka Nongkseh ka la pynkhlaiñ shuh shuh ïa ka jingïalehkai jong ka da ka jingpynmih bujli ia u Shano Tariang, uba la jan thep kol tang hapoh shi minit ba u la rung sha madan, hynrei ka jingpyrshang jong u ka la lait na ka kol.
Hadien kumba 20 minit, u Hamedamanbha Wahlang u la phah ïa ka bol kaba biang bhasha u Shano hynrei u nongap kol ka MLP Eveningstar Bareh, u la mareh shakhmat bad khanglad ïa ka jingpyrshang jong u Shano ban pyniaid ïa ka bol nalor jong u.
U Shano u la don bynta ba kongsan ha ka kol kaba ar jong ka Nongkseh, da kaba rah ïa ka bol na ka liang kadiang bad phah ïa ka bol sha u Dawanchwa Challam. Watla ka bol ka la kynthih bakla, u Dawanchwa u la lah ban pynbeit ïa ka bad thep ïa ka shapoh ka kol ha ka minit kaba 78.
Kane ka kol ka la pyntlot ïa ka jingkyrmen jong ka Meghalaya Police ban wanphai sha ka jingïakhun. U kapten ka Nongkseh, u Hardy Cliff Nongbri, u la pynthikna pura ïa ka jingjop jong ka kynhun jong u da kaba khlieh ïa ka bol na ka jingpynbuh bol kaba biang ha ki minit ba khatduh jong ka jingïakhun.
Ha kane ka phainal, la wan sakhi da kiba bun ki kynrem ki lyndan, hapoh ka jingïalam jong u Myntri ka tnat Sports and Youth Affairs BahWailadmiki Shylla. La donlang ruh u Chief Secretary barim ka jylla, Bah Donald P. Wahlang; ka Director General of Police, kong Idashisha Nongrang; u President ka Meghalaya Football Association (MFA), Bah Hamletson Dohling; u General Secretary ka MFA Sunesh Syiem; bad ki dkhot ba rangbah jong ka Shillong Sports Association (SSA), hapoh ka jingïalam jong u President Bah Banteidor Lyngdoh, uba long ruh u MLA.
Ha ka jingïasam khusnam, ïa ka khusnam T7 Player of the Final la ïoh da u Chesterpaul Lyngdoh jong ka Nongkseh. Ka Nongkseh kum ka lahduh ka la ïoh ïa ka khusnam pisa kaba T. 2 lak, katba ka Meghalaya Police kum ka kynhun kaba wan ba ar ka la ïoh T. 1 lak.
Hadien ka jingkut jong ka SSA Super Cup, ki jingïalehkai phutbol kin dang bteng ha kaba kut jong u snem 2026 da ka jingialehkai SSA Champions Cup ka ban sdang ha kaba sdang jong u bnai Naiwieng, ha kaba ki lahduh bad ki kynhun ba wan ba ar na baroh san tylli ki division jong ka lympung ïalehkai phutbol jong ka SSA kin ïashim bynta.
Kane ka lympung kan long ha ka rukom jingïalehkai league bad knockout, kaba ai sa kawei pat ka kabu ïa ki kynhun ban pyni ïa ka sap bad ka jingtbit jong ki ha madan ialehkai.
