Shillong, Jymmang 05: Bun ki trai khyndew ha ki jaka sor ka jylla Meghalaya kin sa lah noh ban pyntei ia ki projek kiba heh hadien ba ka Kynhun Myntri kala pynduna ia ka jingdonkam jaka na ka bynta ki projek kiba kyrpang ne ‘special projects’ hapoh ka Meghalaya Building Byelaws, 2021.
U Myntri ka Sorkar bad Nongaiktien ka MDA Bah Wailadmiki Shylla ula ong, ba kane ka jingpynkylla kadei kaba la mynjur hynne ka sngi Baar ban pynlong ia katei ka kyrdan kaba lah ban plie lad bha.
“Ka Kynhun Myntri ka Jylla kala mynjur ia ka jingpynkylla ia ki kyndon jongka Meghalaya Building Byelaws, 2021 ha kaba iadei bad ki Special Projects Category,” ula ong.
Ka special projects category ka kynthup ia ki kam pynroi kum ki hotel, hospital, shopping mall, multiplexes, jaka pule, ICT, ki BPO Center bad ki jaka paitbah.
Haduh mynta, ban leh ia ka projek donkam haduh 50,000 sq ft ka jaka bad 20,000 sq ft ia ka jaka ban lah ban iohrung ne Qualify.
“Special Project ka mut kito ki projects/buildings bad ka jingleh ia kiba bun ki kam kum ki hotel, ki jaka treikam paitbah, jaka sumar, jaka pule, shopping mall, multiplex, ICT, BPO, kaba don ym duna ia ka jaka kaba 50,000 square feet bad ka bym duna ia ka 20,000 square feet ia ka Single Cover Area” la ong u Bah Shylla.
Haba kubur ba kila don katto katne ki trai jaka kiba don katei ia ka jaka, ka kynhun myntri kala pynduna noh ia katei ka rukom bhah. Mynta kan long noh 37,500 sq ft ia ka jaka Plot bad 15,000 sq ft na ka bynta ka Single Cover Area.
“Ngi lah iohi ba bun na ki briew ki jong ngi hangne, kin ym don bun bah ka jaka kaba heh haduh 50,000 square feet. Kumta dei na kane ka jingpynkylla, ngi lah pynduna ia ka jaka na ka 50,000 square feet sha ka 37,500 square feet bad ia ka Single Cover Area sha ka 15,000 square feet,” ong u Bah Shylla.
Ula ong, ba kane ka jingpynbeit thymmai kan iarap ia ki nongshong shnong ha sor ban ioh ia ki lad jingmyntoi kiba la don lypa ha katei ka kyrdan.
“Kane ka mut ba ki briew kiba don katei ka jaka ki lah ban tei ia ka Special Project ha kaba ki lah ban tei bun mala kaban ai jingmyntoi bha ia ki” ula bynrap.
