Shillong, Nailur 20 : Ka Jaintia Students Union (JSU)-Jowai Circle, kala ioh ban kem ia lai ngut ki nong Bangladesh ha ka jingtalasi kali ha ka thain Demthring, ha ka sngi U Blei.
Ia kine ki lai ngut la ioh bat na kawei ka kali Tourist rong lieh(ML 04-E-3485) bala register ha ka kyrteng u Bah Treibor Kyndait ba na Shkenpyrsit.
Ka JSU kala kam ba ha ka jingpeit bniah ia ki kot ki sla, kine ki laingut kila phla ba ki dei ki nong Bangladesh.
Ia kine ki briew la ialam noh sha Jowai Police Station bad la aiti sha ki Pulit. Ka JSU kala ujor ruh ia ka ejahar pyrshah ia ki.
Ka JSU kala kam ruh ba ki don ki briew kiba donkti ha ki kam pynrung briew beain na Bangladesh, kila pyrshang ban wad ia ki lad ki lynti bad kila thong pisa da ki lak tyngka ban pynlait noh ia kine ki nong Bangladesh ba ioh bat.
“Kila tyrwa pisa ia ngi ba kot da ki lak tyngka ban pynlait noh ia kine ki briew. Ngi la kyntait ia kane ka pisa bad ngi la leit ban ujor ia ka ejahar” ong u Education Secretary ka JSU Bocheru Mi Pohsnem.
