T.5000 haduh T.1 lak ka kuna ia ki nongbylla bar jylla ba khlem register | Maham u DC ia ki nongaikam /contractor

Shillong, Jymmang 05 : U Deputy Commissioner ka East Garo Hills ula pynmih ia ka jingbthah paidbah ba pynlong kongsan ban register kyrteng ia baroh ki nongbylla bar jylla (migrant worker) ha ka District hapoh ka Meghalaya Identification and Registration (Safety & Security) Act, 2020, haba maham ban shah dain kuna bad shah set along ia kiba pynkhein ain.

Ka jingbthah ka ong ba kine ki sienjam ki dei kiba la shim da ka jingthmu ban pynthikna ia ka jingshngain, ka jingpynneh ia ka suk ka sain, bad iada ia ka hok jong ki nongbylla bad ki nongshongshnong.

“Ki migrant worker ki mut ia kino kino ki briew ki bym dei ki nongshongshnong ka Jylla kiba ioh bylla ha kano kano ka jaka trei. Baroh kine ki nongbylla ki hap ban register bad ioh ia ka registration card kaba treikam” ong ka jingbthah.

La tynrong ia ka jingbahkhlieh ha ki nongaikam ba kin pynthikna ba ki nongbylla bar jylla ba ki ai kam, kin dei kiba la pynrung kyrteng ialade lyngba ka online portal http://www.investmeghalaya.gov.in da kaba aiti ia ki kot ki sla kum ka Aadhaar, EPIC, lane PAN card ha ryngkat bad ka dur.

La ong ruh ba ia ka jingpynrung kyrteng lah ban leh offline ha ka Ophis jong ka Tnad Labour lane ha ka Deputy Labour Commissioner, East Garo Hills.

U DC ula maham ba ka jingbym bud ryntih ia kane ka jingbthah kan khring ia ka jingshah dain kuna.

“Ki nongaikam ki bym pynrung kyrteng iala ki nongtrei ki lah ban shah dain kuna hapdeng T.5000 haduh T.1 lak bad ka jingpynkhein arsien laisien, ka lah ban lam sha ka jingset along. Ki nongbylla bym pynrung kyrteng ruh ki lah ban shah dain kuna” ong ka jingbthah.
Kala bynrap ruh, “Kano kano ka jingleh donbor lane niew bein pyrshah ia ki nongbylla bar jylla ka dei kaba ngat ha ka jingpynshitom kat kum ka ain”.

“La bthah ia baroh kiba don bynta ba kin bud pyrrkhing ia ka jingbthah na ka bynta ka jingshngain bad jingshong ain” pynkut ka jingbthah.