Shillong, Jymmang 04 : Ka Joint Action Committee ka Meghalaya Muster Roll Workers Union ha ka sngi Nyngkong, kala ai khublei ia u Myntri Rangbah ka Jylla Conrad K Sangma namar ka jingpynkiew ia ka Variable Dearness Allowance (VDA) ki muster roll bad ki nongbylla sngi, haba ong ba u CM ula “jubab da ka kam” ia ka jingdawa bala slem bah jong ki.
U nongaibuit ka JAC Bah Khroo L Pariat ula ong ba ka jingpynbna ha ka May Day kala weng ia ki jing sngewkhia kiba ka Union kala pynsngew da ki snem.
“Ha ka 1 tarik Jymmang, kaba dei ka May Day, ngi iohi ba u Conrad K Sangma ula pynbna ba la pyn kiew ia ka VDA na ka bynta ki muster roll bad ki nongbylla sngi” ong u Bah Pariat.
“Ngi pdiang ia kane ka jingpynbna lane ka hukum bala pynmih da ka Tnad Labour bad ha kajuh ka por ngi ai khublei ia u Myntri Rangbah ba ula ai ka jingmynjur ia ka jingdawa jong ngi bad shimkhia ia kaei kaba ngi la pynpaw, ia kiba ngi la iakhih la slem bha” ula ong.
“U Myntri Rangbah ka Jylla ula jubab da ka kam” bynrap u Bah Pariat.
Ka JAC ka don jingthmu ban pynlong ia ka jingiakhih ha baroh kawei ka Jylla ha ka 11 tarik Jymmang, hynrei kala weng noh ia kane ka jingthmu hadien jong ka rai ka Sorkar.
“Ha ka jingshisha, ngi la thmu ban iakhih ha ka 11 tarik ha baroh kawei ka Jylla, hynrei ka Sorkar lyngba u Myntri Rangbah, kala sngap ia ki jingdawa jong ngi” ula ong haba pynpaw ba kane ka jingpynkiew ia ka VDA kan ai jingmyntoi khamtam eh ia ki nongtrei kiba la rangbah.
Haba phai sha ka jingkynthup lang ia ka EPF, ula ong ba u Myntri Rangbah ula mynjur da ka ktien ha ka jingiakynduh ba long ha ka 9 tarik Iaiong. ‘Kaba kongsan eh ka dei ka EPF. Halor kane, ka JAC kala aiti ia ka jingthoh, bad ha ka jingialang bad u Myntri Rangbah ha ka 9 tarik Iaiong, na ka liang jong u, ula mynjur ba ka SorkarPdeng kala ong ba baroh ki nongbylla sngi, ha ki tnad, ha ki kompani, contractor kiba don palat 20 ngut ki nongtrei, ki dei ban ai ia ka EPF” ong u Bah Pariat.
“U Labour Commission ruh ula dep pynmih ia ka jingbthah da ka jingthoh sha ki Tnad bapher bapher ba dei ban pyntreikam ia ka EPF” ula bynrap.
Ka JAC kala kyntu ia baroh ki Tnad Sorkar kynthup ia baroh ki Ophisar, ki Engineer ba kin pyntreikam noh ia ka EPF kumba la pynpaw da u Myntri Rangbah ba dei ban pyntreikam ia ka
Ula kyntu ruh ia ki nongtrei ba kin iashimbynta. “Lada pyntreikam ia ka EPF, ki nongbylla sngi ki dei ban wan shakhmat ban kyrpad ia ki Ophisar ba kin pyntreikam ia ka. Ka don ruh ka pension ha ka EPF.
 ki muster roll bad ki nongbylla sngi, haba ong ba u CM ula “jubab da ka kam” ia ka jingdawa bala slem bah jong ki.){kind=link}