Guwahati, Jymmang 5: Ka jingshah rem ha ka elekshon kaba dang shu dep na ka bynta ki longïing ha ka saiñ pyrthei ba pawnam ha Assam hadien ba lai ngut ki khun shynrang jong ki myntri rangbah barim ki la duh noh ïa ki constituency jong ki da ka jingïapher kaba khraw, kaba la thoh ïa ka histori kaba thymmai da kaba pynkut noh ïa ka (dynastic politics) ne ka politic kaba synshar tang da kawei ka iing ha Assam.
U President ka APCC uba dei ruh u MP Lok Sabha ba lah long haduh lai sien u Gaurav Gogoi u la shah rem ha Jorhat.U dei u khun jong u myntri rangbah barim ka jylla u Tarun Gogoi, u la shah rem ha u MLA ba shong jong ka seng BJP u Hitendra Nath Goswami da 23,182 vote.
U Debabrata Saikia, u khun jong u myntri rangbah barim u Hiteswar Saikia ruh um shym la lah ban jop ha Nazira constituency, kaba dei ka jaka ba ktem ba skhem jong ka longiing kaba la slem bha.Ia kane ka seat la mihkhmat da u kpa jong u bad hadien pat da ka kmie jong u ka Hemoprava Saikia.
U Saikia, uba la bat ïa katei ka seat naduh u snem 2011 bad uba la long kum u Nongïalam ka Liang Pyrshah naduh u snem 2016, u la shah rem ha u Mayur Borgohain jong ka BJP da palat 46 hajar vote.Ka jingshah rem u Debabrata Saikia ka la pynkut noh ia ka politic kaba synshar tang da kawei ka iing.
U Saikia u khlem lah ban pynbeit ia ki jingeh jong ki paidbah.Ki jingshna ia ki surok kim pat biang ha Nazira.
Sa kawei pat ka jingshah rem ka long ha Barkhetri, ha kaba u Diganta Barman, u khun jong u myntri rangbah barim ka Jylla, u Bhumidhar Barman, u la shah rem ha u kyrtong ka BJP, u Narayan Deka, da palat 84,000 vote.
“Katkum ka mon jong ki paidbah ha Assam.Ka jingkut noh ka politic kaba synshar tang da kawei ka iing ha ka sain pyrthei, baroh lai ngut ki khun jong ki myntri rangbah barim ka Assam ki rem ha ka elekshon.Ki nongthep vote ki kwah ia ka jingkylla bad ki kwah ban pynkut noh ia kum kane ka sain pyrthei ha ka jylla.Napdeng jong ki u Gaurav Gogoi u dei u kyrtong uba khlain tam hynrei u rem ha ka elekshon,” la ong u political anylist.
U la bynrap, “Mynta ka kynti kane ka elekshon ka la pher na ki snem ba la dep namar ba ki briew ki la thep vote na ka bynta ka roi ka par.Ha kane ka kynti kim long kiba don kata ka jingsngew (emotion) ne kim shym la thep vote ha ka jingsngew jong ki,”.
Haba ïakren bad ki nongthoh khubor, u Myntri Rangbah ka Assam u Himanta Biswa Sarma u la ong ba kam don “eiei kaba bha ban sngew ha ka jingshah rem jongno re jongno,” khamtam eh haba ïadei bad u khun jong u Hiteswar Saikia. Hynrei u la pynksan ba ka result ka pynpaw ia ka jingkyntait kaba kham khraw ia ka sain pyrthei da ki nongjied.
“Ka politik jong ka blue blood ka la shah kyntait ha ki paidbah.Ki la don bun ki lad ban pynskhem ia la ka jong ka jinglong hynrei kim shym la lah,” la ong u Sarma.
 ne ka politic kaba synshar tang da kawei ka iing ha Assam.){kind=link}