Guwahati, Jymmang 05: Ka jingjop kaba khraw jong ka kynhun National Democratic Alliance (NDA) ba ialam da ka BJP ha ka election sha ka iing dorbar thawain jong ka jylla Assam, u Myntri Rangbah ka jylla u Himanta Biswa Sarma ha ka sngi Nyngkong u la kyntait halor ka jingiania ha kaba iadei bad u Zubeen Garg ka ba ktah ia ka jinglong jong ki nongthep vote.
Haba kren sha ki lad pathai khubor hadien ka jingmih ka result, u Sarma u la ong ba kane ka mat—kam shym la ktah ïa ka mon bad ka jingkwah u paidbah. Katba ki bynta jong ka liang pyrshah ki khmih lynti ba kan pynkhih ia ki nongthep vote, u la ong, ha kaba kut kam shym la lah ban pynsawa ha madan. Ha ka jaka kata, u la kynthoh, ka jingpyrshang ban buh shakhmat ia kum kine ki mat ka lah ban pyniakhlad ia ki nongjied.
Haba ai khublei ia ki paidbah ka Assam, u myntri rangbah u la ong ba ka jingmih ka pyni ia ka jingbteng jong ka jingshaniah jong ki paidbah ha ka sorkar jong u. U la kdew ba ka NDA ka la buh thong ban ïoh haduh 100 tylli ki seat, da kaba bynrap ba ka jingmih ka la ïahap bha bad kita ki jingkhmih lynti.
Shuh shuh u Sarma u la kynthoh ruh ïa kaei kaba u la batai kum ka jingïathuhkhana kaba la jied kyrpang ha kylleng ki kyrtong ka “Gen-Z”, da kaba kynnoh ba ïa kane ka kyrteng la pyndonkam bha na ka bynta ki khmat jong ka liang pyrshah, katba ki nongïalam ba dang kham samla ka BJP, kynthup ïa ka Rupali Langthasa, kim shym la ïoh ïa ka jingïarap kaba kum kata.
Halor ka jingithuh hasain pyrthei, u nongïalam ka BJP u la ong ba ki jingpyrshang ban pynïapher ha ka imlang sahlang jong ka Assam katkum ka jaitbynriew, ka niam ne ki jingngeit kin ym jop, da kaba pynksan ïa ka jinglong bapher bapher ha ka imlang sahlang jong ka jylla.
Haba phai sha ka jingtreikam jong ka liang pyrshah, u Sarma u la kam ba ka jingmihkhmat jong ki kan long kaba duna, khamtam eh hapdeng ki nongthaw aiñ kiba dei na ka jingneit Hindu. U la pynpaw ruh ba ki nongïalam na kiwei pat ki party ki dang pdiang sngewbha ban rung sha ka BJP lada ki ïahap bad ka jingmut jingpyrkhat jong ka, da kaba kdew ïa ki nongïalam ba dang shu rung shen kum u Bhupen Borah bad u Pradyut Bordoloi, kiba baroh arngut ki la ïoh ïa ka jingjop hadien ba ki la kylla liang.
Halor ka jingthaw sorkar, u Sarma u la ong ba ka tarik ban bam smai ka dang hap ban pynbeit.U la bynrap ruh ba u myntri rangbah un hap ban resain shwa, hadien kane ka party kan jied ia u nongialam jong ka.Ia kane ka jingpynbna, u la ong ba yn sa pynbna da u state president ka BJP, u Dilip Saikia.
 ba ialam da ka BJP ha ka election sha ka iing dorbar thawain jong ka jylla Assam, u Myntri Rangbah ka jylla u Himanta Biswa Sarma ha ka sngi Nyngkong u la kyntait halor ka jingiania ha kaba iadei bad u Zubeen Garg ka ba ktah ia ka jinglong jong ki nongthep vote.){kind=link}