Mizoram | Pynbna ka Jylla bala lait na ki kam kaikhlaw hadien ba wan pyndem noh ka kynhun ba khatduh

Aizawl, Jymmang 1: Ha ka sienjam ban sah jingkynmaw na ka bynta ka shongsuk ha ka thaiñ Shatei Lammihngi, ka Mizoram ka la pynbna ïalade ba ka la “lait na ki lehnoh” hadien ba ka kynhun lehnoh ba khatduh eh kaba dang sah, ka Hmar People’s Convention (Democratic), ka la pyndem noh ïa ki tiar ïaleh ha ka sngi Palei.

Baroh 43 ngut ki dkhot, kynthup ïa u nongïalam u Sanate, ki la pyndem bad aiti ïa ki tiar ïaleh jong ki ha ka “jingïalang wanphai iing bad ka jingaiti ia ki tiar” kaba la pynlong ha Sesawng hajan Aizawl, ka kdew ia ka jingpynkut noh da ki phew snem ha ka jylla.Ia kane ka kynhun ba la ialam da u Sanate la niew kum ka kynhun ba khatduh eh kaba treikam hapoh Mizoram.

U Myntri Rangbah ka Jylla, u Lalduhoma, uba la don lang ha katei ka jingïalang, ula khot ïa ka, kum ka “jinglong kaba kongsan ha ka histori jong ka Mizoram,” da kaba pynskhem ba ym don ki kynhun lehnoh kiba don tiar ïalehkai kiba treikam mynta ha katei ka Jylla.
“Ngi baroh ngi dei ki Mizo… ngin roi tang lyngba ka jingïatylli,” u la ong, da kaba kyntu ïa ka imlang ka sahlang ban ïaid shabar jong ka jingïapher jaitbynriew bad ban pdiang ïa ka jinglong ba ïasam lang.

Haba pyrkhat ia la ka jong ka bynta ha ki jingpyrshang iasuk kiba la dep ha ka por jong ki lehnoh ba la ialam da ka Mizo National Front, u Lalduhoma u la ong ba “ka dor jong ka jingsuk ka long kaba heh,” da kaba pynkynmaw ia ka rai jong u ban iehnoh ia ka kam Indian Police Service ban noh synniang ha ka jingpynbeit ia ki jingiakynad.

U la iaroh ia ki dkhot ba la wan pyndem noh, da kaba ong ba “tang kiba shlur shisha ki don ka bor ban buh ia ki tiar ialeh na ka bynta ka jingbha kaba kham khraw.”

Kane ka jingwan pyndem ka long hadien ka jingïateh kular ba la ïasoi ha ka 14 tarik u Iaiong hapdeng ka sorkar Mizoram bad ka HPC(D), kaba la pynkut noh da kaba suk ïa ka jingïakhih da ki tiar ha katei ka thaiñ.

Ki kam lehnoh ha Hmar ka sdang naduh ki snem 1980 ba la dep, kaba la pynlong da ki jingdawa ban ioh ia ka Autonomous District Council hapoh ka Sixth Schedule. Katba ki jingiateh kiba kham mynshuwa ha u snem 1994 bad 2018 ki la wanrah ia ki kynhun kiba heh sha ka lynti kaba dei, ka kynhun Sanate ka dang treikam haduh mynta.

Da kane ka jingaiti kaba khatduh, ka Mizoram ka la khang ia ka lynnong kaba jrong jong ki kam lehnoh, kaba plie lad ia ka jingshong suk shongsain, bad ka ka roi ka par ha ka jylla.