Nongpoh, Jymmang 1: Ka ophis u Sub Divisional Officer ka Patharkhmah Civil Sub Division ka la pynlait paidbah ia ka programme kaba la tip kum ka Green Force Patharkhmah ban wanrah ia ka khuid ka suba ka mei mariang bad ki wah ha ka thain.
Ia kane ka prokram la kyrshan da ka Ophis u Deputy Commissioner ka Ri-Bhoi ha ryngkat ka Ophis ka Meghalaya Basin Development Agency. La plie ia kane ka prokram da u Myntri Sorkar Bah Sosthenes Sohtun ha ka jingiadon ryngkat u SDO ka Patharkhmah Chaitanya Awasthi bad kiwei kiwei.
Ka Ophis u SDO ka pynshai ba ka thong jong kane ka programme ka long ban peit pyrman ia ka khuid ka suba ka mei mariang, ka jingpynneh ia ki wah bad wahduid lyngba ka jingiatreilang ki nongshong shnong naduh ki khun samla bad pyntip ba kan sa don ruh ka Inter Village Development Championship bad kiwei kiwei.
U Bah Sosthenes Sohtun, u la ai ia ka jingiaroh ia ka ophis u SDO bad kiwei kiwei ki tnad sorkar kiba la shim ia kane ka sienjam kaba kongsan ban ri ban sumar ia ka mei mariang khamtam ka khuid ka suba ha ki shnong ki thaw bad ka mei mariang kaba long kaba kongsan haduh katta katta.
Kum u nongmihkhmat na Jirang Constituency, u la khot la wer ia ki nongshong shnong ban ai ka jingiasnohkti lang ha kane ka thong kaba kongsan da kaba iatreishitom ban pynneh ia ka khuid ka suba ha la ki Shnong ki thaw bad ki sawdong sawkun, bad bynrap, ba ka jingkhuid kam dei than tangban wanrah ia ka koit ka khiah hynrei ka jingitynnad ruh jong ka mariang.
Ha kane ka sngi, la sam ruh ia ki tiar ki tar kiba donkam ha kaban pynkhuid ia ki sawdong sawkun bad pynbud ruh sa ka jingpynkhuid ia ka madan Western Ri-Bhoi bad ki lynti ki synkien ha ka thaiñ Patharkhmah.
