Shillong, Iaiong 30 : Ka Jaintia National Council (JNC) kala ai ka jingujor sha ka Meghalaya State Pollution Control Board (MSPCB) pyrshah ia ka public hearing na ka bynta ka Shree Cement ha Nongkhlieh, East Jaintia Hills District, kaba la buh ban long ha ka 22 tarik Jymmang, haba kdew ia ki jingkynnoh pynkhein ia ka Environmental Impact Assessment (EIA) ha ka kaiphod ka kompani.
Ia kane ka ujor la aiti da ka kynhun ba ialam da u President ka JNC Sambormi Lyngdoh hadien ka jingiakren bad u Member Secretary jong ka MSPCB.
“Ngi kwah ban pynshai ba ka jingthmu jongngi kam dei ban pyrshah ia ki kam pynroi, hynrei ban pynbeit ia ki jingpynkhein ia ki ain” ong u bah Sambormi ha ka kyrwoh bala ai ha ka sngi Palei.
Ka jingpyrshah ba nyngkong eh jong ka JNC ka dei halor u pud u sam.
“Nyngkong, ka project kam hap hapoh u pud u sam ka Sorkar Jylla, Kat kum ka jingpynbna ka EIA 2006, kano kano ka mining lease ba palat ia ka 50 hectare lah khein kumka Category A Project, kaba hap hapoh u pud u sam ka Sorkar Pdeng lyngba ka MoEF&CC” ong u Bah Sambormi.
“Ka par jong ka Shree Cement ka heh haduh 217 hectare, kaba heh haduh laishah. Ka SEIAA, Meghalaya kam don ia ka bor lane ka ain ban ai ia ka ToR na ka bynta ka project. Namar kata, kano kano ka kam bala leh hapoh ka ToR, kynthup kane ka public hearing, ki long beain bad ka bym ieng satia hakhmat ka ain”.
Ka jingpynkhein kaba ar, kat kumka JNC, ka iadei bad ka jingtreikam jong ka EIA hi.
“Kaba ar, ia kane ka EIA la pynkhreh kyrpang na ka bynta ka project ha Gujarat. Ka slab a nyngkong jong ka EIA preamble ka batai shai, ha ka ktien jong u consultant : “Ka thong ba nyngkong jong kane ka EIA ka long ban ioh shuwa ia ka environmental clearance na ka Environmental Inpact Assessment Authority jong ka Jylla Gujarat” ong u bah Sambormi.
“Kane ka pyni ba kane ka EIA kam treikam satia ha Meghalaya. Balei ba tyrwa ban pynlong ia ka public hearing ha Meghalaya” ula buh jingkylli.
“Kaba khatduh, ka Shree Cement kala aiti ia kane ka EIA khlem ka mining plan kaba la ai jingmynjur da ka Indian Bureau of Mines. Kat km ka EIA jong ki, ia ka par ym lah ban pyniaid khlem ka mining plan bala mynjur, kat kum ki kyndon ain” ula ong.
Ka JNC kala pynsngew ruh halor ka jingbuh kyrdan ia ka jinglong ka mariang ha ka thain.
“Kaba saw, ka Saipung Reserve Forest ka don tang 4.26 km na ka jaka ba thmu ban pyntrei ia ka project, kumba pynpaw ha ka EIA. Ka EIA notification u snem 2006 ka pynpaw ba ki jaka ba hapoh 5 Km la ithuh kum ki category A, hynrei ka EIA ka pynpaw ba ki hap hapoh ka kyrdan B”.
Haba kyrpad ia ki trai shnong, u Bah Sambormi ula ong “Ka Union ka phah ia ka khubor sha ki nongshongshnong ka Nongkhlieh Elaka, kiba dei hok ki trai jaka “ kynmaw ba haba ka komoani ka wan ban iakren ban thied ia ka jaka na ka bynta ban tih par, kam dei ka jaka ba ki kwah, hynrei ki marpoh khyndew kiba don hapoh jong ka”.
“Ka khubor kaba shai ka long : “Wat ym die ia ki jaka da ka jingduhnoh ia ka nongkynti jong phi. Ka jingthied jaka da ki kompani ka iasyriem kumka jingthied jhur, wat ki jaka ban shna iing mynta ki shongdor da ki hajar tyngka shi square foot bad haduh katno ka jaka ba 217 hectare ka dei ban shongdor? Wat ym biej ha ka spah ba shipor, hynrei, to ngin nang ban sumar iala ka khyndew da ka jingpyrkhat jngai”.
 kala ai ka jingujor sha ka Meghalaya State Pollution Control Board (MSPCB) pyrshah ia ka public hearing na ka bynta ka Shree Cement ha Nongkhlieh, East Jaintia Hills District, kaba la buh ban long ha ka 22 tarik Jymmang, haba kdew ia ki jingkynnoh pynkhein ia ka Environmental Impact Assessment (EIA) ha ka kaiphod ka kompani.){kind=link}