Iasoi MoU ka Meghalaya bad ka CK-12 Foundation ban kyntiew ia ka jingpule Science bad Maths

Shillong, Iaiong 30 : Kum ka jingpyrshang ban pynkhlain ia ka jingpule Science bad Mathematics, ka Sorkar Meghalaya kala iatehlok bad ka CK-12 Foundation ba na United States ban wanrah ia ka jinghikai kor Digital, ki tar hikai (interactive learning tools) ha ki skul ha kylleng ka Jylla.

Ka soskular, bala iasoi hapoh ka Meghalaya Programme for Adolescent Wellbeing, Empowerment and Resilience (MPOWER) bad pyntreikam da ka Meghalaya Basin Management Agency, ka thmu ban pynkhlain ia ka bor sngewthuh bad ka jingiashimbynta ki khynnah skul-khamtam ha ki skul Sorkar bad kiba ioh jingiarap na ka Sorkar.

Ki Heh Ophisar ki ong ba kane ka jingiatreilang kala wan ha ka por ba ka Jylla ka thmu ban pynlong kongsan ia ka jingpule Science bad Mathematics ha ka jingpynkylla ia ka curriculum ba dang iaid mynta.

“Ngi thmu ban pynlong ia kine ki sobjek kiba khamsuk ban ioh pule, ba lah pynurlong bad kaba ki nongpule kin shimbynta” ong u Vijay Mantri, Commissioner & Secretary ka tnad Pule Puthi bad Co-Project Director ka MPOWER.

Hapoh ka MoU, yn pyndonkam ia ki rynsan ai jinghikai ban buh da ka CK-12 ki ban kyrshan ia ki jingai jinghikai haki kamra long klas, ka jingpule hi bad ka jingai jinghikai da ki nonghikai. Kane ka rynsan ka tyrwa ia ka lad ban iakren markhmat, ka jingpynwandur bad ki tiar ba pyndonkaam da ka AI bala pynwandur ban pynsuk ia ki jingmut kiba eh.

Ka Jylla kan sa pyniaid ruh ia ki jingai jinghikai ia ki nonghikai bad ki prokram ban pynroi ia ka bor hikai ki ban pynthikna ia ka jingpyndonkam bha ia ki kor digital ha ki kamra long klas.

U Bah Banteilang Kharshandi, Director of School Education and Literacy, ula ban jur ia ka jingkongsan ka jingpule da kaba pyni lyngba ki kam bad ka jinglong ba khreh jong ki nonghikai.

“Ka jingtei ia ka jingsngewskhem ki Nonghikai ka long kaba kongsan bha ban wanrah ia ki jinghikai ba thymmai bad kiba ioh jingshemphang ha ki kamra klas” ula ong.

Haba mihkhmat ia ka CK-12, u Nongsenglang Miral Shah ula pynpaw ia ka bynta jong ka Artificial Intelligence ha ka pule puthi. “Ka jinghikai digital, ha ryngkat ka AI, ka ai ia bun ki lad ki lynti ban pynlong kyrpang shimet ia ka jingpule” ong u Shah.

Kane ka jingiasoi MoU kala sakhi ia ka jingiashimbynta jong ki nongmihkhmat na ki skul, ki Heh Ophisar ka Tnad Pule Puth, bad ki paralok ba iatreilang kynthup ka Nice Infotech bad kiwei kiwei.