Shillong, Iaiong 27: U Myntri Sorkar uba khmih ia ka tnad Revenue and Disaster Management u Bah Lahkmen Rymbui ula ong, ba ka jylla kala long kaba la pynkhreh lada jia ba don ka jingwan lynshop ka bor mariang bad la bthah ia baroh ki bor pyniaid District ba kin long kiba husiar bad kiba peitngor.
“Ka Sorkar Meghalaya bad ka kynhun jongka Disaster Management kila long kiba la pynbiang bad pynkhreh ban shimkhia ia kino kino ki jingjia bad kaba kham kongsan eh kadei kumba ngi tip, da ka jingdon ki kor teknoloji ngi lah ban tip lypa hashwa” ong u Bah Rymbui haba iakren bad ki nongthoh khubor hynne ka sngi Nyngkong.
Ula ong, ba ym don ia ki jingtip ne kaiphod kumba ka long mynta ha kylleng ki bynta jong ka jylla, hynrei ki kynhun ne Response Team kidei kiba la sdang pyntreikam.
“Kane ka kynhun, la kadei na ka ophis jong u SDO ne DC ha kylleng jong ka Meghalaya kadei kaba la pyntreikam kaba la peitngor ban shimkhia ia kino kino ki jingjia kiba mih” ula ong.
“To ngin ia kyrmen ba kan ym don ka jingjia hynrei baroh ki kynhun kiba iadei bad ka jingwan lynshop ka bor mariang kidei kiba la pynkhreh lypa”.
U Bah Rymbui ula banjur ba jingshimkhia mardor haba don kino kino ki jingjia kadei kaba la pynbeit ryntih bad ki bor pyniaid district kidei kiba la shah pynkup bor ban kin shimkhia mardor da ka jinglaitluid.
“Ki district magistrate kila shah pynkup bor kum ki Chairman jong ka Disaster Management ban khmih ia ki jingjia hapoh jong ka district. Kumta kam dei eh ia ngi ha ka ‘State Level’ ban peit ia kitei ki kam” ula ong.
“Ka Disaster Management Rules kala pynkup bor ia ki district magistrate ba kin leh lut baroh ia kaei kaba donkam bha” ula bynrap.
Ha kaba iadei bad ka jingdon jong ki briew, u Myntri ula ong, “Ngi lah long kiba la pynkhreh bha ia ki jingdonkam, la kadei ki briew namar ba ka jingwan lynshop ka bor mariang kam dei tang ia ka sorkar. Ngi dap da ka jingkmen ba ki paitbah kila ai ka jingiatreilang kaba pura bad ngi don ia ki kynhun na ka Home Guards, Pulit, Fire Service bad baroh kine ki kynhun kidei kiba la peitngor bad husiar bha” ula ong.
“Kaba kham kongsan eh, kaba nga sngewkmen kadei ba ki paitbah ka Meghalaya kila ai bha ia ka jingiatreilang ban iakhun ia kino kino ki jingwan jia jong ki jingjia” ong u Bah Rymbui.
Ula pynshai ba ka Disaster Management kala iaid palat ban ia ka jinglong jingman ka suinbneng, ula ong, “Haba ngi kren shaphang ka jingwan lynshop ka bor mariang, kam dei tang namar ba slap. Haba ngi khmih ia ki jingjulor, ngi hap ruh ban peit la kane ka kynroh ne ki lum ki long kiba skhem ne em, hato lyngba ka jingpom ia ki dieng ki siej kan ktah ne em ia ka rukom pyniaid ia ki kam kiba iadei bad ka jingshah pynjulor, kadei kaba don bynta ia kiei kiei baroh”.
“Haba ngi kren shaphang ka jingjulor kam dei tang shaphang u slap, kam dei tang ia u jumai ne kiei kiei namar ki don ruh ki jingjulor kiba la thaw hi ruh da u briew ne ki aksiden kiba lah ban jia” ula ong.
Ha kaba iadei bad ka por jong ka jingbhah tyngka, u Bah Rymbui ula pynpaw ba kane kadei kaba la iaid ha ka lynti da kaba bynshet ha ki tnad. “Kumba nga lah ong ha phi, ngam don ia ki rekod hynrei ki Deputy Commissioner kidei kiba la pynkhreh pura ban iakhun, lada ka don kano kano ka jingduna jong ka jingbhah tyngka ki lah ban phah da ka jingthoh sha ka sorkar jylla khnang ba kan ioh ban leh noh mardor ia kaba donkam” ula ong.
“Ban khmih ia ka jingjulor kam shong tang ha kawei ka tnad hynrei ngi lah bate ia baroh kiei kiei ban iohi ba kin lah ban shimkhia bad leit mardor sha ki paitbah kiba la shah ktah” la bynrap u Myntri Sorkar.
