Shillong, Iaiong 27 : Ka Khun Hynniewtrep National Awakening Movement (KHNAM) kala kynnoh ba ka kompani NESS, ka kompani na Assam bala buh dak iong da ka Khasi Hills Autonomous District Council (KHADC), ka dang iashimbynta ha ka jingiakhun ban pyntrei ia ki kam Sorkar bad kyntu ia ka Council ba kan leh eiei mardor.
Ha ka kyrwoh bala pynmih ha ka sngi Nyngkong, u Working President ka KHNAM Bah Thomas Passah ula ong “Kat kum ka jingkren sha ki lad pathai khubor da u Chief Executive Member (CEM) ka KHADC, la pyntip ba ka Council kala buh dak iong (blacklist) ia ka NESS (ka kompani na Assam kaba pyniaid ia ka jingpynbiang briew ban shakri ha ki tnad bapher bapher) namar ba kala pynkhein ia ka Trading by Non Tribal Regulation 1954”.
U bynta ba ka Trading Licence bala ai da kane ka kompani na ka bynta ka kam contract ha ka KV Laitkor ruh lah dep ban pynduh noh.
Hynrei, ka KHNAM ka kam ba kane ka kompani ka dang iashimbynta shitrhem ha ki jingiathong ioh kam ha ka Jylla.
“Ngi la ioh jingtip ba kane ka kompani ka dang iashimbynta bha ha ka jingiathep tender bala pynmih da ki tnad bapher bapher” ula ong haba bynrap “Mynta kae ka kompani kala iashimbynta bad kala ioh ruh ia ka tender bala pynmih da ka KV Shillong Peak”.
U ong ba ka KHNAM kala dep iakren ia kane ka kam bad ka Council. “Ngi la dep pyntip ia kane sha ka KHADC bad kyrmen ba u CEM un leh eiei mardor pyrshah ia kane ka kompani” ula ong.
 kala kynnoh ba ka kompani NESS, ka kompani na Assam bala buh dak iong da ka Khasi Hills Autonomous District Council (KHADC), ka dang iashimbynta ha ka jingiakhun ban pyntrei ia ki kam Sorkar bad kyntu ia ka Council ba kan leh eiei mardor.){kind=link}