Shillong, Iaiong 27: U Myntri uba khmih ia ka Tnad Revenue and Disaster Management u Bah Lahkmen Rymbui ula pynpaw ia ka jingsngewkhia halor ka jingtwa bad jinghap ki mawbah kaba la lam sha ka jingkhlad jong ki arngut ki briew hynrei ula pynpaw pat ia ka jingsngewhun halor ki sienjam kiba la shim da ka sorkar ban ialeh ban pynkloi ha kaban shna pyndep noh ia ka surok Shillong-Dawki.
“U SDO ka Pynursla ula dep ban ai ia ka por bad sa shisien bad ka maham bad ka pyrkhing bad kaei kaei kaba la jia ka long kaba sngewsih” ong u Bah Rymbui, uba long ruh u MLA ka UDP na Amlarem, hynne ka sngi Nyngkong.
Ula pynpaw ba lah dep bthah ban pynlong ia ka jingtohkit ne Inquiry halor katei ka jingjia. “Nga dap da ka jingkmen ba ka sorkar kala bthah ia u SDO ban tohkit halor kitei ki jingjia” ula ong.
Ha kaba iadei bad ka jingtrei ia ki kam ha ka surokbah, u Myntri ula ong “Dang shen nga lah iohi ia kawei ka kynhun kaba pyntrei ia ka surokbah khamtam ia ka Shillong-Dawki kala shim ia ki sienjam ban peit lypa ruh ia kiei kiei kiba lah ban wan jia bad dei halor kane ngi lah pynduh noh ia kito ki lum ha Mawlieh.”
“Ngi kyrmen ba da ka jingiatreilang hapdeng ki bor pyniaid district bad ki kynhun kiba pyntrei ia ka kam kidei ban don ban shimkhia ia kane ka jingeh kaba phi lah kren ne pynsngew” ula bynrap.
Halor ka jingkylli, u Bah Rymbui ula ong, “Ngam sngewhun namar ba ngi lah duh ia ki jingim briew, hynrei nga sngewhun pat ki sienjam kiba la shim da ka sorkar ban peit ba dei ban shna pyndep ia ka surok bad kaba kham kongsan eh ba kan ym don shuh shuh kano ka jingmih jong ka jingjulor”.
“Hadien ba kala don ka jingjia jong ka jingjulor, nga sngewsih bha ban iohi ba kum kitei ki jingjia ki wan jia” ula ong.
Ula kyntu ban long kiba husiar ha kaba iadei bad ki projek kiban dang wan.
“To ngin ia kyrmen ba baroh ki kynhun kiba pyntrei ia ka kam bad ka sorkar ruh kadei ban shim ba kum kitei ki jait jingjia kim dei ban iai jia shuh haba ki pyntrei ia kino kino ki projek ha ka bynta jong ka jylla Meghalaya,” la bynrap u Bah Rymbui.
