Mudui ka HYC sha High Court halor ka jingbym shngain ka rukom pyntrei ia ka surok Shillong-Pynursla

Shillong, Iaiong 21: Ka Hynniewtrep Youths’ Council (HYC) ha ka sngi Ba-ar kala mudui ia ka mukotduma ha Iingkashari Meghalaya High Court, ba kyrpad ba kan tuklar mardor ia kaei kaba ka khot “ka jingma kaba nang kham shyrkhei” halor ka jinglong jingman jong ka surok Shillong–Pynursla–Dawki kaba dang iaid ha ka jingpyniar bad ka jingtei.

Ha ka kyrwoh, u President ka HYC u Bah Roy Kupar Synrem ula ong, ba ka seng kala ai jingmut ia ka sorkar jylla, NHIDCL bad ia ka Public Works Department (PWD) ban pyntreikam mardor ia ki lad jingiada, ban leh ia ka road safety audit, ban pyrkhing ia ka rukom iaid ki kali ha ka por ba dang iaid ka jingpyntrei bad ban pynthikna ba kan don ka jingshim ia ka jingkitkhlieh da ki bor kiba dei khmih ban ai ka jingshngain ia u paitbah.

“Ka surok kala nang buh ha ka jingma na ka bynta ki nongiaid nongieng namar ka jingbym shngain ka rukom shna kaba kynthup ia ka jingbym don ia ki jingthoh kiba ai ia ki jingmaham, jingker, ki jingai dak bad ka jingbym don ruh iaka rukom kaba biang ha kaban phiah ia ki surok ha kylleng ki jaka” ula ong.

Ka Council kala kam ba katto katne ki bynta jong ka surok kila kylla long kiba don jingma bha kaba lam sha kiba bun tylli ki jingjia aksiden, ki jingmynsaw bad ka jingjulor ki kali.

Kala pynpaw ia ka jingsngewkhia ba bun ki jingim ki lah ban duh lada ym shimkhia mardor ia ki lad jingiada bad ban pyntreikam noh ia ki.

“Ki kam pynroi bad ki projek jong ki jingtei ym dei ban pyniaid shakhmat ban buh ha ka jingma ia ka jingim ki briew hynrei ka jingshngain jong ki paitbah dei ban buh hakhmat eh” ong u Bah Synrem.

“(Ngi) pynpaw ia ka jingkyrmen ba ka High Court kan tuklar ban pynthikna ba ia ki lad jingiada dei ban buh ryntih khnang ban iada bad ba kan ym don shuh ka jingduh ia ki mynsiem briew bad ia ki jingdon jingem” ula bynrap.