Nongpoh, Iaiong 15: Uwei u samla na Patharkhmah ula ujor da ka ejahar sha ki Pulit ba pyntip ba ula shah thok pisa ha u briew uba kam ialade ba dei na ka kompani Bajaj Finance Loan da ka jingkular ban pynioh ram.
Une u samla u kyrteng u Shemborlang Syngkli ba na Umkadhor Patharkhmah, Ri-Bhoi District.
Haba pyntip sha ki Nongthoh Khubor, u Shemborlang Syngkli u la iathuh, ba u la mad ia kane ka jingshah shukor pisa namar ka jingiohi ha ka rynsan Facebook kaba tyrwa ban ai ram marmar, bad namar ka jingbym poi pyrkhat u la kum leit ban pyndap ia ki form bad kiwei kiwei ki jingdonkam kum ki bank account, number phone bad kiwei kiwei.
U iathuh ba hadien kumba 3 kynta eiei, u wei u briew ba la tip kyrteng kum u Monaj Pal u ba kam ba u dei na katei ka company, u ba la batai shaphang ki jingdonkam ha kaba nyngkong u la phah ban siew ia ka pisa kumba 1 hajar tam eiei ban leh ia ka bank account, hadien pat la pan biang sa 4 hajar tam ban leh ia ka Insurance bad hadien la phah ban iakren bad u Branch Manager jong katei ka company bad bthah ruh ban siew sa 6500 na ka bynta ka GST.
U iathuh ba kane ka rukom phah siew pisa kala pynsuba jur ia u ba ka lah ban dei ka kam shukor jong kane ka kompani.
Halor kane, une u samla ula leit ujor da ka ejahar ha Patharkhmah Police Station haba kyntu ia ki Pulit ba kin thwet ia ki briew bad ia kane ka kompani.
