Kyntu ka Sorkar ia ka GTF ban pynkut noh ia ka jingshah jingit | Ym don jingtei eiei ha Lumpongdeng

Shillong, Iaiong 15 : Ka Sorkar Jylla kala kyntu ia ka Green Tech Foundation (GTF) ba kan weng noh ia ka jingshah jingit ba khlem pud, haba pynpaw ba kan ym don satia kano kano ka jingtei ba neh shirta ha dewlynnong Lumpongdeng haba mynjur lang ia ka jingmut jong ka Foundation ban pynneh pynsah ia ka sawdong sawkun ka dewlynnong kumba ka long.

Kane ka jingkyntu kala mih hadien ba ka Director ka Tnad Tourism BL Pakyntein, kala shong iakren bad ki nongialam ka GTF, kiba dang pynlong ia ka jingshah thngan ba khlem pud haba dawa ban pynduh pyndam ia ka project kam jngohkai hapoh ka dewlynnong.

“Ngi kyrpad ban weng noh ia ka jingiakhih namar ngi sngew ba kaei kaba ki bthah bad kaba ki kwah ka dei ruh kaba ngi kwah, kata ban pynneh pynsah, ban kyntiew, bad ban pynneh ia ka mariang hangtei kumba ka long khnang ba ki briew kin iohi” ong ka kong Pakyntein.

Kala ban jur ba ka Tnad kam don jingthmu ban tei ia kano kano ka jingtei ba neh shirta hapoh ka dewlynnong. “Kumta, kaei kaba kikwah ka dei ruh kaba ngi kwah : Ym don jingtei ba neh shirta bad ban pynleit jingmut hakhmat eh ia ka mariang ha Lumpongdeng” kala ong.

“Ka jingthmu ba kongsan jong ki ka dei ka Lumpongdeng, bad ngim pat ju ong ba kan don ka jingtei ba neh shirta ha Lumpongdeng. Ngin dang iai bteng, bad ngi long kiba kloi ia kano kano ka jingiakren, ka jingiasyllok bad ki” bynrap ka Director.

Halor ka jingdawa ka GTG ban pynduh pyndam ia ka project hapoh ka dewlynnong, ka kong Pakyntein kala pynshai ba kam don satia kum kata ka project.

“Ka jingkwah jong ki ka ong ba ngin pynsangeh noh ia kino kino ki project hangtei ha Lumpongdeng, hynrei ka jingkylli ban weng noh ia ki project ha Lumpongdeng kam mih satia namar kam don project satia ha Lumpongdeng” kala ong.

Kala bynrap ba kino kino ki kam ba iadei bad ka kam jngohkai kan don da u pud bad kan hap hapoh ka jingbishar.