Ki nongwei kin hap shim permit shuwa ban rung sha Meghalaya
Shillong, Rymphang 18 : U Myntri Rangbah ka Jylla Conrad K Sangma ula pyntip ha Iingdorbar Thaw Ain ha ka sngi Balang, ba ka Sorkar ka dang bishar ia ka jingtyrwa ban pynbna ia ka Meghalaya kum ka Protected/Restricted Area hapoh ka Immigration and Foreigners Act, 2025, shuwa ban iakren bad ki kynhun bapher bapher.
Kat kum ka jingong jong u, kane ka jingthmu ka long ban wanrah ia ka rukom treikam kaba pynlong kongsan ia ki nongwei nabar ri, ba ki dei ban don ia ka permit hashuwa ba kin rung sha Meghalaya.
Haba jubab ia ka jingkylli u Nongialam ka Liang Pyrshah Mukul Sangma ba ong ba kumno kane kan iarap, u Conrad ula ong “ Ka technology ka don bad ka technology ka dei ka nongpynsuk ba khraw eh ban pynthikna ba ngin don ia ki lad ki lynti ki ban iarap ia ngi. Ngi dang iapyrkhat halor kane ka mat. Ngi tip bha ba ki don bun ki nongwei kiba wan da ka lynti kaba dei, lada ngi leh ia kane, kaei ka ban ktah ia ka kam jngohkai”.
Ula ban jur ba ka jingiasyllok bad ki kynhun ka sengbhalang, ki tour operator bad ki seng sain pyrthei kan sa iai hadien ka jingiakren bad ka Ministry of Home Affairs bad ka jingpynkhreh ia ki technology.
“Ngin pat long kiba la khreh hynrei namar ba ka Jylla ka mih, la pynbor ia nga ban ai ia kane ka jubab. Ngi dang shong bishar ia ka..Ngi dang leh ia ka homework bad hadien kane ngin sa sdang ia ka jingiakren jong ngi bad ki kynhun bapher bapher” ula bynrap.
U Myntri Rangbah ula pynshai ba ka jingthmu ka long ban pynieng ia ki Entry-Exit Point ban talasi, bad ong “Ia mynta ka jingeh bad kaei kaba ki paidbah ki sngewkhia ka dei ka entry-exit point…ngi kwah ia ka jaka kaba lah ban talasi ia ki briew lada donkam- kane ka dei ka jingthmu”.
Haba kren ia ka jingsngewkhia halorka Sixth Schedule, u Conrad ula ong “Ka jingiakren ia ka Sixth Schedule ka Riti Synshar ka Ri kam mih satia. Ka jingthmu ka longban don ia ka rukom peitbniah ba thikna ia ka jingwan beain ki mynder ri…Ka ILP ka dei kawei kaba don ia kum kane ka lad jingiada, ngi sngew ba ka Immigration & Foreigners Act ruh ka dei kawei pat ka lynti ia kaba ngi lah ban wanrah ia kum kane ka lad jingiada”.
