Shillong, K’lyngkot 2: Ka Deputy Commissioner ka South West Garo Hills ka Anendya Raajsshre hynne ka sngi Nyngkong, kala kyrpad ia ki paitbah ban pynneh ia ka shongsuk shongsain bad ban ia imlang da ka jingsuk, ban iatreilang bad ki bor pyniaid district bad ban kiar ban shim ia ka ain ha la ki jong ki kti.
Haba kren ha ka jingialang iasuk ne Peace Meeting ha Ampati, ka Raajsshre kala ong, ba ka district kadei kaba la bna nam la slem kum kaba ia imsuk imsain wat hapdeng ka jingdon jong ki jaidbynriew bad niam bapher.
Ki bor pyniaid district kila pynthikna ha ki nongiashimbynta ha ka jingialang ba ki dang trei sha ka bynta ban don ia ka jingpynbeit kaban neh shirta ha kaban iatreilang bad ki bor pyniaid district jongka West Garo Hills bad South Salmara district jong ka Assam bad ka kyntu ia ki nongkhaii bad ki nongshong shnong ba kin long kiba iai shah bad kiba jai jai.
U Superintendent of Police u Vikash Varma ruh ula kyrpad ia baroh ki jaidbynriew ban pynneh ia ka jingsuk, ban pynshisha shwa ia kino kino ki jingtip kiba pynsaphriang ha ki rynsan social media bad ban pyntip haba don kino kino ki jingjia sha ki thanad pulit kiba jan tam ha ka jaka ban leh eiei hi nalade.
Ia kane ka jingialang la lum da ki bor pyniaid district jong ka South West Garo Hills District ha Ampati hynne ka sngi Nyngkong.
La pynlong ia ka jingialang namar ka jingbym don ia ka jingshongsuk ha ka thain kaba la ktah ia ka jingdie ia u kwai da ki nongkhaii bad ki nongrep namar ka jingiakynad ha rilum Garo bad ha kane ka jingialang la wan ban iashimbynta da ki Nokma, nongialam na ki kynhun niam bapher bapher, ki kynhun sengbhalang, ki nongshong shnong, ki nongialam jong ki Market Committee, ki nongrep kwai bad nongkhaii.
Ha katei ka jingialang ki nongai jingkren kila pynpaw ia ka jingsngewkhia na ka bynta ki nongrep kwai bad la banjur ia ka jingkongsan ban pynneh ia ka shongsuk, ban don ka jingsuk ha ka imlang sahlang bad ha kajuh ka por ban buh ha ki jingpyrkhat ia ka jingsngew jong ki paitbah ka thain.
Ka jingjia kaba dang shen ha ka shnong Goalgaon ka dei kaba la pynrem jur, ha kaba ki nongiashimbynta kila kyntu ban pynneh ia ka shongsuk shongsain ha ka thain.
La pynpaw biang ia ka jingiengskhem jong ka thain kidei kiba don ia ka histori ban ia imsuk imsain lang naduh ki por shwa ban ioh ia ka jinglaitluid hynrei ka jingpynthud kaba la pynmih da ki katto katne ki riewshimkabu kadei kaba la lah ban pynbeit noh da ka jingiakren.
