Shillong, Jylliew 05 : U Myntri ka Ministry of Health & Family Welfare Jagat Prakash Nadda ula pyniaid ia ka jingialang jong ka Ministry Parliamentary Consultative Committee ha Shillong bad bishar ia ki kam ba iadei bad ki prokram halor ka koit ka khiah ki Khynnah ha India.
Ia kane ka jingialang la pynlong ha Courtyard by Mariot, Shillong, hynne ka sngi Thohdieng.
Kane ka Committee, bala iashimbynta ruh da ka Myntri Khynnah ka Ministry for Health & Family Welfare Anupriya Patel, kala iakren sani ia ki prokram halor ka koit ka khiah ki khynnah ha India bad ki lad ki lynti ban pynjanai ia ki Policy kiba don jingiadei bad kane ka kam.
Ha kane ka jingialang la wan iashimbynta da ki MP ka Lok Sabha Dr CN Manjunath, Dr Sanjay Jaiswal, Rajabhau Parag Prakash Waje, Satish Kumar Gautam, Brijendra Singh Ola, Anoop Pradhan bad Dr Sharmila Sarkma.
Ki MP ka Raja Sabha kiba la iadonlang ki kynthup ia ka Dr. Kalpana Saini, Haris Beeran, Dr. Parmar Jashvantsinh Salamsinh, Dr. Radha Mohan Das Agarwal, Renuka Chowdhary, badd Rajathi.
U Secretary ka Ministry Punya Salila Srivastava, Health Research Secretary bad ICMR Director General Dr. Rajiv Bhal, bad u Director ka NEIGRIHMS Prof Nalin kila iadonlang ha ka jingialang.
Hadien kane, ka Committee kala leit sha NEIGRIHMS ban bishar ia ki jingtei jong ka hospital bad ki jingshakri halor ka koit ka khiah jong ki Khynnah. Ki Dkhot kila leit jngoh ruh ia ka Pediatric OPD bad Ward, iakren bad ki nongpang bad pynpaw ia ka jingsngewhun halor ki jingsumar ba kane ka hospital kala ai.
Haba rakhe ia ka World Environment Day, ka kynhun kala pynlong ia ka jingiathungdieng ha NEIGRIHMS.
