Shillong, Jylliew 05: Ka Nongkseh SSCC kaba la iakhun ha ka sien kaba nyngkong eh ha ka Meghalaya State League, kala ioh syndon ban rah ia ka nam lahduh ne Champion jong ka MSL 2026 da kaba pynrem ia ka Langsning FC da 2-1 kol ha ka jingiakhun final ba la long hynne ka sngi Thohdieng ha SSA Stadium.
Ka stadium ka la dap smam da ki nongpeitkai bad ki nongkyrshan jong kine ki ar tylli ki kynhun ialehkai football ka jylla.
Ka Nongkseh kadei ka kynhun kaba la ialehkai bha ha kane ka lympung iakob bad kala wan phai na ka jingshah thep shi kol ban pynphai kylla 2 kol ia ka Langsning ban ioh rah ia ka nam lahduh.
Ka Nongkseh SSCC kala thaw record ha Jylla ban long ka kynhun kaba nyngkong eh ka ban khur haduh 4 tylli ki trophy kum ka Champion khlem da shah rem shisien ruh-kaba la bteng naduh ka samoi ialehkai ka Shillong Sports Association (SSA) jong ka samoi bala lah bad ka 5th Meghalaya State League ba mynta.
Ka Nongkseh SSCC kala khur nyngkong eh ia ka nam Champion jong ka SSA 1st Division khlem ka jingshah rem shisien ruh, bud sa ka SSA Champions Cup 2025-ka lympung ialehkai ba dang sdang nyngkong eh ha Jylla.
Hadien kane, kala leit iakhun ha ka 11th All India Chief Minister Gold Cup Football Tournament ha Sikkim bad ioh rah ia ka nam lahduh khlem ka jingshah pynrem shisien ruh.
Da ka jingjop ia ka MSL, ka Nongkseh kala ioh pdiang ia ka khusnam ryngkat bad ka song pisa kaba T.8 lak na u Myntri Rangbah ka jylla u Conrad K Sangma, ha kaba la iadonlang u Symbud Myntri Rangbah u Bah Prestone Tynsong, u Myntri ka tnad Sports and Youth Affairs u Bah Wailadmiki Shylla bad ngut ki kynrem ki lyndan.
Ka Langsning kaba la wan ba-ar ha kane ka jingiakob, kala ioh ia ka song pisa kaba T.5 Lak bad kadei ruh syndon ka jingai ia ka khusnam da ka pisa kaba heh tam ha ka histori jong ka MSL.
Haba phai sha ka jingiakhun, hashwa ban kut noh artad ka kylla step ha ka minit kaba 45’+1 kala don ka jingbakla haba ka bol kala leit dei ia u Banpynkhrawnam Nongkhlaw bad kala ruh pynban shapoh kol jong ka Nongkseh bad ka Langsning kala ioh ei ia katei ka shi kol.
Ha ka kylla miet ka Nongkseh kala sdang ban ialehkai bha bad ha ka minit kaba 61 u Kapten ka Nongkseh u Hardy Cliff Nongbri ula ioh thep ia ka kol bad ha ka minit kaba 68 ka Nongkseh kala ioh thep ia ka kol ka baar lyngba u Shano Tariang uba la mih bujli ha ka kylla miet.
Ka jingiakhun hapdeng kine ki artylli ki kynhun kala long kaba itynnad bad ia ka MSL la pynlong lyngba ka jingshimkhia jong ka Meghalaya Football Association ha ryngkat bad ka jingioh ia ka jingkyrshan kaba radbah na ka Directorate of Sports and Youth Affairs ka jylla.
Ka jingwan ai jingkyrshan ki nongpeitkai ruh kala long kaba biang bha ha baroh ki jingiakhun jong kane ka MSL kaba mynta ka kynti, hynrei ka jingshongshit pat kaba mynta ka sngi kala long ha kawei pat ka kyrdan, ia kaba ia ki tiket lah dep ban die lut naduh ka por mynsngi kaba pyni ia ka jingieid bad jingshongshit ki paitbah ia ka jingialehkai football hapoh ka jylla.
Ha kane ka aiom ialehkai ka MSL, ki don 33 tylli ki kynhun kiba la wan ban iashimbynta bad kala kham bun ban ia ki snem kiba la dep, la pynlong ia ki jingialehkai ha ki 8 tylli ki jaka bad ki jingiakhun baroh kila don haduh 139 sien bad kane ka lympung iakob mynta u snem kala lah ruh ban pyndep ia baroh ki jingbthah jongka All India Football Federation bad kane ka jinglah ban pynlong ia bun tylli ki jingiakhun bad ka jingryntih jong ka jingpyniaid kan plie lad ia ki kynhun ban ioh iashimbynta ha ka I-League 3.
Kane ka lympung iakob ialehaki kala long kaba jop lyngba ka jingiashimbynta jong ki kynhun ialehkai bad ka jinglah jong ki bor kiba dei khmih ban pyniaid ia kane ka jingiakhun kaba long ruh shi bynta jong ka jingrakhe ka MFA ia ka Jubili Ksiar.
Ha kane ka sngi la sam ruh ia ki khusnam shimet ha kaba u rangialehkai ka Nongkseh u Kitboklang Pale ula ioh ia ka khusnam ‘Player of the Final’, u Guidle Syiemlieh jongka Nongkseh ula ioh ia ka khusnam Best Goalkeeper, u Nelson Rymbai jongka Langsning ula ioh ia ka khusnam ‘Top Scorer’ da kaba ioh thep 23 kol bad u Hardy Cliff Nongbri jongka Nongkseh ula ioh ia ka khusnam ‘Player of the Tournament’.
