Guwahati, January 27: U Myntri Rangbah ka Jylla Assam, u Himanta Biswa Sarma, ha ka sngi ba-ar ula ther tyngeh ia U Rahul Gandhi, nongialam jong ka seng Congress, da kaba kynnoh ba u la niewpoh ia ka riti dustur jong ka thain shatei lam mihngi, ha ka por ba u leit jngoh dang shen ha Digboi.
Haba kynthoh ia ka jingjia kaba la iathuh ba ka la jia ha kawei ka jingialang paidbah, u Myntri Rangbah u la kynnoh ba u Rahul Gandhi u la kyntait ban pdiang ia ka jingainguh kaba dei ka kolshor tynrai, kaba u la ong ba ka pyni ia ka rukom bym khein snep ia ki riti dustur tynrai.
U Sarma u la kynnoh ba kum kane ka jingleh kam dei ka jingjia kaba kyrpang bad u la kynnoh ïa ka longïing ki Gandhi ba ki ju niewpoh ïa ki riti dustur bad ki jingsngew jong ki briew na ka thaiñ shatei lam mihngi.
“Ki paidbah ka Assam bad ka thaiñ Shatei Lam mihngi ki burom bha ïa ki rukom leh tynrai jong ki.Ka jingkyntait ïa ki jingainguh tynrai la ïohi kum ka jingniewpoh,” ong u Sarma bad bynrap ba kum kine ki jingjia ki la ju jia ha ki por ba la dep haba ki nongïalam ba rangbah jong ka Congress ki ju wan jngoh ïa kane ka thaiñ.
U HImanta u la pynpaw ba ki nongïalam ka Congress ki la leh klet ïa ki jingmyntoi jong ki jaidbynriew trai ri trai muluk bad ha ka jaka kata ki la pyni ia ka jingbym shimkhia ïa ka jinglong kyrpang bad ka pateng jong ki. Haba pynrem ia katei ka jingjia, u Sarma u la ong ba ki nongialam kiba wan jngoh ia ka Assam ki dei ban burom ia ki riti dustur.
U la kyntu ruh ia u Rahul Gandhi ba un burom ia ki jinglong tynrai jong ki briew ka thain shatei lam mihngi shwa ba un wan jngoh biang ia kane ka jylla.
