Shillong, K’lyngkot 25: U Bah Hally War na ka Jylla Meghalaya ula ioh ia ka khusnam Padma Shri Award 2026 ha ka jingtrei mon sngewbha, ka khusnam kaba heh tam hapoh ka ri ban ai burom ia ki nongshong shnong.
U Bah War, uba la don 67 snem ka rta uba na ka Shnong Siej kaba hap ha East Khasi Hills, ula ioh ia ka jingithuh ia ka kam kaba ula leh ha kaban thain ia ki jingkieng diengjri, kaba dei ka jingleh tynrai ha ka thain.
Ka jingnoh synniang u Bah War kadei kaba la ioh jingithuh hapoh jong ka “People’s Padma” ka sienjam kaba thmu ban ai burom ia ki riewshlur kiba la noh synniang radbah bha sha ka imlang sahlang.
Ki kam ki jongu ha kaban pynneh pynsah ia ka jingthain tynrai ia ki jingkieng diengjri kadei kaba la ioh ia ka jingiaroh bad jingithuh kum ka jingnoh synniang kaba kordor ha ka kolshor ba riewspah barim bajah jong ka ri India.
U Bah Hally War ula ioh ia ka jingithuh halor ka jingtrei kaba shi lynter ka jingim ka jongu ban pynneh pynsah ia ka jingkieng diengjri, kaba dei ka nuksa kaba phylla ban iada ia ka mariang bad kumjuh kaba la tip kum ka Bio-Engineered Heritage.
Ka khusnam Padma Awards, kadei kaba la sam ha ki 3 tylli ki kyrdan kaba kynthup ia ka Padma Vibhushan, Padma Bhushan bad ka Padma Shri, ia kine la pynbna man la ka snem ha ka jingrakhe ia ka Republic Day ban ai jingithuh ia ka jingtrei bad jingnoh synniang kaba radbah ha ki bynta ki bapher bapher kaba kynthup ia ka Art, Social Work bad Medicine.
Mynta u snem, ki don 131 ngut ki riewshimet kiba la shah jied ban ioh ia kitei ki khusnam, ha kaba 5 ngut kin ioh ia ka Padma Vibhushan, 13 ngut ia ka Padma Bhushan bad 113 ngut kin ioh ia ka khusnam Padma Shri.
Ia kitei ki khusnam yn aiti da ka President ka ri India ha ka jingialang kaban long ha Rashtrapati Bhawan ha u bnai Lber ne Iaiong man la u snem.
Halor kane ka jingioh khusnam u Bah Hally War, na ka liang u Myntri Rangbah ka Jylla u Conrad K. Sangma ula pynpaw “U Bah Hally War u long u nongrah Tiensyiem ba shisha ia ka spah jong ka jingdon jingem kaba naduh hyndai hynthai, ka riti dustur tynrai bad ka jingleh ban pynneh pynsah”.
Ula pynkynmaw ia ka por ba ula leit sha ka shnong Siej ha East Khasi Hills ha kaba u Bah War ula sdang ban thain ia ki jingkieng diengjri naduh ka rta kaba u dang dap 10 snem.
U Myntri Rangbah ula pynpaw ba u durom bha ia ka mariang, ia ka jingstad tynrai bad ia ki nongialam ha ki shnong ki thaw.
